Школань важодеманть панжомсто, Мордовиянь Прявтось Артём Здунов тешкстызе истямо лувонь эрявиксчинть: «Юты овсе аволь ламо шка, 20-30 иеть, ды тынь карматадо ветямо масторонть. Тынь ней уш кочкинк се кинть, конась лезды тенк кеместэ тень теемс. Тынь тонавтнетядо минек масторонь сехте вадря вузтнэсэ, кочкиде истят ответственной специальностть. Мон ваннынь кругловой стольтнень прявт тематнень - те течи сехте талновтыця кевкстематне. Мельспаро ули кунсоломс тынк - ве ёндо варштавкс, апак талакавто, апак стакалгавто эрьва чинь кевкстематнесэ ды стакачитнесэ».
Школань научной тректне алкукс актуальнойть: те биотехнологиятне, цифровой технологиятне, промышленностень ды экономикань виевгавтомась, раськень идентичностесь – культурань кодонь ванстомась ды виевгавтомась. Мероприятиянтень пурнавозетне истя жо кармить кортамо од ученойтнень профессиональной траекториятнеде, студентэнь научной обществатнень виевгавтомадост, свалшкань питнейчитнень ванстомадост ды кемекстамодост.
Республикань руководителесь явсь мель минек региононь башка ёнкстнэнь лангс, конатнень марто од ученойтне теевить содавиксэкс, ды важодемань прявт ёнкстнэнь лангс – те виев диверсифицированной экономикась, биоэкономикась ды велень хозяйствась, раськень ёнкстнэ, раськень ванстомась ды лият.
«Прявтось, мезе тесэ получатадо – те келейгавтсынк эсь сюлмотнень, возможносттнень, получатадо од сюлмот, - тешкстызе Артём Здунов. - Ней сехте прявтось - вейсэндявомась. Зярдо вейсэндявить ломантне, сы шкань профессионалтнэ палыця сельме марто – те улияк минек масторонть виезэ».
Пленарной промксонтень пурнавозетненень видеосвязенть вельде пшкадсь Россиянь образованиянь академиянь академикесь, М.В. Ломоносовонь лемсэ МГУ-нь Ероков од ломантнень марто важодемань коряс управлениянь прявтось-проректорось Татьяна Кортава. Сон тешкстызе региононь Прявтонть улемань эрявиксчинть: «Сисем иетнень перть, кода важоди школась, васенцеде панжомасонть ули губернаторось. Монь ульнесь мелем панжомс школа самай Мордовиясо – те перспективной, эрязасто виевгадыця регионсонть. Ды штобу минек од ломантне неевлизь од типень ды, кода мерить, президентэнь гвардиянь руководителень личностенть. Тынь неинк, Школань кодамо паро программа анокстасть од ломантне. Минек од ломантне молить виде киява. Инескеть, кирвазтеде эсь вийсэнк сетненьгак, кить тонавтнить тынк университеттнэсэ. Невтинк проекттнэнь, конат лездыть тынк региононь виевгавтомантень».
МР-нь промышленностень, наукань ды од технологиятнень министрань тевтнень топавтыцясь Александр Давыдкин ёвтнесь «Научно-технологическое и инновационное развитие Республики Мордовия» государственной программадонть, тешкстызе, 2023 иестэ республикась совась россиянь ТОП-25 регионтнэнь юткс научно-технологической ды информационной виевгавтоманть коряс. Профессорось, Н. П.Огарёв лемсэ МГУ-нь культурологиянь ды библиотечно-информационной ресурстнэнь кафедрань прявтось Марина Логинова невтинзе культурань енкссо университетэнь проекттнэнь.
Саранск ошонь инжетнень учи содавтома Н.П. Огарёв лемсэ МГУ-нь лабораториятнень, региононь промышленной потенциалонть, эрзянь ды мокшонь культуранть марто. Проекттнэ, конат чачить научной вейсэнь важодеманть лувсо, кармить минек госуниверситетэнть лия вузтнэнь марто вейсэнь важодемань юрокс.
Мордовия Республикань Прявтонь Пресс-службась