Ванновсть инфраструктурань объекттнэнь, сынст ютксо жилищно-коммунальной хозяйствань ды энергетикань, истя жо социальной сферань объекттнэнь антитеррористической ванстомань кевкстематне. Пурнавозетне башка мель явсть школатнесэ сэтьмечинь ванстомань эрявиксчинть лангс. Башка мель явозель образованиянь учреждениятнесэ оповещениянь ды эвакуациянь систематнень путомантень. Кода невти весероссиянь практикась, аволь штатной тевтнень лисемстэ эряви топавтомс педагогтнень ды тонавтницятнень виде тевдеемаст.
«Эйкакштнень тонавтомаст ды кастомаст-превс путомаст туртов сэтьме пространствась – прявт тев. Истя жо покш мель эряви явомс эрямонь-аштемань объекттнэнь антитеррористической сэтьмечинь кевкстематненень», – тешкстызе Артём Здунов.
Промксонть лувсо кортасть профилактикань тевдеемадонть. Тенесэ анокт лездамс СВО-нь ветерантнэ - «Защитники Отечества» Государственной фондонь руководителенть Алексей Герасименконь валонзо коряс, боевой тевдеематнень ниленьгеменде ламо ветерантнэ евтасть мель ютавтомс школасо тонавтницятнень марто патриотической важодема – 12 муниципальной образованиятнесэ СВО-нь участниктне – свалшкань инжеть «Разговоры о важном» школань вастовоматнесэ.
Промксонть ушодовомадо икеле Артём Здунов макссь казне СВО-нь участникентень, Рузаевкань енксонь эрицянтень, сон сась отпусков. Россиянь Федерациянь Президентэнть Указонзо коряс Отечестванть ды Россиянь Федерациянь государственной мельтнень-ванновтнень ванстоманть пингстэ боевой тевдеематнесэ невтезь отваганть, самоотверженностенть ды мужестванть кисэ, минек землякось казезь Жуковонь медальсэ. Мордовиянь Прявтось тешкстызе, передовойсэ минек воинтнэ эрьва чистэ топавтыть пек стака тевть Тиринь масторонь мельтнень-ванновтнень ванстоманть коряс, секскак тылсэяк эряви теемс весементь эрицятнень сэтьмечист туртов.
Мордовия Республикань Прявтонь пресс-службась