Апрелень 29-це чистэ Саранскоесь вейсэндяви Весероссиянь экологиянь субботникентень. Эйсэнзэ примить участия предприятиянь ды организациянь важодицятне, государственной ды муниципальной властень представительтне, студенттнэ ды од ломанень организациянь активисттнэ, истя жо весе эрицятне, кить бажить неемс тиринь ошонть ваньксстэ.
Коенть коряс, субботниксэнть примить участия од ломанень ды патриотонь вейсэндявкстнэ.
Мордовиянь студенческой отрядтнэс совицятне ванськавтсызь 1№ Мемориальной калмолангонть. Арсеви, субботникенть лувсо Саранск ошось ды районтнэнь куншкакуротне анокставить Маень 9-це чинь Ине Изнямонь кеняксчинтень.
Мордовия Республикань «Поиск» патриотической вейсэндявксонтень совицятне ванськавтсызь-мазылгавтсызь Саранскоень ды республикань районтнэнь сядодо ламо памятной таркатнень. «ЭКА» Россиянь пиже движениянь активисттнэ ошонь эрицятнень марто вейсэ апрелень прядовомсто ютавтыть «Экодвор» сисем покш кенярксчить. Васенце истямо кенярксчись ютавтови апрелень 29-це чистэ 11 чассто «Юбилейноень» васенце микрорайонсонть.
Весе, кинь ули мелест, тердевить ульцятнень ды кудотнень вакссо таркатнень ванськавтомо!