«Кавто енкстнэ, конатнень республикась кочкинзе прявтокс, – чачтоматнень ламолгавтомась ды икеле пекстазетненень важодемань таркатнень максомась – касыть федеральной покш проектс ды уш невтить цетавкст. Кемтяно, инфраструктурась, конась течи тееви Национальной социальной инициативанть лувсо, лезды истят решениятнень ливтемс федеральной уровняс ды примамс решеният Россиянь Федерациянь весе субъекттнэсэ», – мерсь АСИ-нь генеральной прявтось Светлана Чупшева.
Мордовиянь Прявтось Артём Здунов тешкстызе, регионось анок максомс эсь важодевксэнзэ. Икеле пекстазетненень важодемань таркатнень максомань коряс проектэнтень мель явсть Московонь, Пензань, Саратовань областтне, Ставрополень енксось, Удмуртиянь, Ульяновскоень ды Нижегородскоень областтне.
«Натой аволь покш важодемась, невтемакс, лездамс тенст [пекстазетненень] ютамс аттестация, теевемс содавиксэкс сы шкань важодемань таркатнень максыцятнень марто, канды покш смусть», – мерсь Артём Здунов.
Проектэнть анокстызе республикань региононь сервисной уполномоченноесь Елена Семелева, сон важоди региононь прявтонь советникень статуссонть. Светлана Чупшевань валонзо коряс, РСУ-нь ды региононь властень истямо важодеманть мереви ловомс модельноекс лия субъекттнэнь туртов.
«Ламот субъекттнэнь прявттнэ энялдыть невтемс РСУ-нь важодиця лув, свал евтаса республиканть: кода тынк важоди РСУ-сь, кодат тевть топавты. Тесэ эдь аволь ансяк социальной кевкстемат витевить, сервис-дизайнась – те технология, конань мереви нолдамс тевс госуправлениянь эрьва кодат тевтнень пингстэ. Тынь пек лезэвстэ нолдынк тевс те инструментэнть», – мерсь Светлана Чупшева.