Мордовиянь Прявтось евтась сюкпря домкомтненень республикань эрицятнень праваст ды мелест-ванновтост ванстомасо ерокчинть кисэ. Ванномась невтизе, лисить ламо кевкстемат, конат токшить вейсэнь ули-паронь управлениянть, кудотнень перька таркатнень вадрялгавтоманть-мазылгавтоманть, кудотнень витнемс ды кирдемс ярмактнень лезэвстэ тевс нолдамонть. Эрицятнень пельде сыть ламо пшкадемат: энялдыть ванномс управляющей компаниятнень. Лиясто азортнэнь яволявтомаст подъездсэ киякстнэнь шлямодо, тротуартнэнь, эйзюротнень урядамодо кадовить апак топавто. Домкомтнень мельтнень-арсематнень ютксто вейкесь – пштилгавтомс управляющей компаниятнень туртов лицензированиянь вешематнень. Истямо законопроектэнть уш ванныть эксперттнэ ды сон, паряк, ули совавтозь ванномас Государственной Думань тундонь сессиясонть.
МР-нь Энергетикань ды ЖКХ-нь министрась Александр Голянин пшкадсь эште вейке арсема марто – киртямс управляющей компаниятнень ламочист реорганизациянть вельде ды совавтомс те важодемантень ули-паронь муниципальной пелькс марто организациятнень, конат улить анокт пурнамс квалифицированной кадра марто важодиця коллективть, пурнамс услугатнень шкастост ды вадрясто топавтомаст туртов механизматнень ды машинатнень парк.
Вастовомасонть максозель вал тердезетненень, секскак кевкстематне ульнесть вейсэнь ды башка эрицятнень пельде, сынь токшить ламо квартирань кудотнень стакачитнень. Сынст ютксо - «Ремондис», «Т Плюс» компаниятнень марто пелькстамонь тевтне, кудотнень перька китнень витнемань ды таркатнень вадрялгавтомань-мазылгавтомань кевкстематне. Бути вастовомантень домкомтне ютасть а кемема ды талнома марто, сонзэ прядовомадонзо мейле – лиссть вадря ежосо. Секс мекс сыненст максозельть каршо валт ламот кевкстематнень лангс. Вана вейке невтемась. Якшамковонь 1-це чистэнть саезь вийс совасть РФ-нь налогонь кодексэнтень полавтоматне, сынь токшить Кудотнень советтнэнь председательтнень ды тов совицятнень каземанть, сонзэ эйстэ эряви пандомс налог. Ней сонзэ эйстэ пандови НДФЛ ды страховой пандома. Мордовиянь Прявтось кармавтсь республикань МинЖКХ-нь ды Минюст-нь муемс решения, конась лезды кирдемс домкомтнень.
Истя жо кемекстазь решения МКД-нь ды ТСЖ-нь советтнэнь председательтнень туртов тонавтомань семинартнэнь ютавтомадо, эрявикс юридической лезксэнь явомадо. Ды сехте прявтось – истят вастовоматне кармить свалшкань. «Седе покш лезэвчинть туртов эряви кочкамс вастовомань кевкстемат ды ванномс сынст нучк-пачк», – мерсь Артём Здунов.
Домкомтнень пельде ульнесть аволь ансяк энялдомат, истя жо сюкпрянь валт уш витезь кевкстематнень кисэ. Луховкасто Раиса Исаева пачтясь сюкпрянь валт эрицятнень пельде поселканть вадрялгавтоманзо-мазылгавтоманзо кисэ, истя жо энялдсь путомс мадезь аштиця «полицейскойть» вейке кинть лангс. МКД-нь советэнь председателесь Татьяна Бундина, эри Химмашсо ды важоди домкомокс уш 34 иеть, энялдсь витнемс муниципальной кинть, конась моли кудонть икельга, истя жо тердсь инжекс. Домкомтнень весе пшкадемаст улить ваннозь. Сынст коряс важодемась уш ушодовсь. Мордовия Республикань Прявтонь ды Мордовия Республикань Правительствань Администрациянь руководителенть Булат Хайрутдиновонь арсеманзо коряс республикань ЖКХ-нь министерстванть пингстэ тееви консультативной орган, конась лезды витемс лисиця стакачитнень ды ладямс те енкссо важодеманть.
ТСЖ-нь председательтнень ды домкомтнень туртов тонавтомань семинарось ютавтови даволковонь 29-це чистэ 15 чассто адресэнть кувалма: Саранск ош, Коммунистической куро, 33, корп. 2. Яволявтоматнень каямонь туртов электронной почтась: gosgilrm@e-mordovia.ru
Мордовия Республикань Прявтонь пресс-службась