Демографиянь темась весе неть кевкстематнень коряс ашти прявтокс. Самай те ёнксонтень алтазель «Демографическое будущее: от вызовов к решениям» стратегической сессиясь, конась ютась ожоковонь 8-це чистэ. Сонзэ важодемасонзо ульнесь Мордовиянь Прявтось Артём Здунов, сон РФ-нь Госсоветэнь «Семья» ёнксонть коряс комиссиянь прявт.
Неень шкань масторлангонь прявт тенденциятнень ютксо ульнесть невтезь каявоматне гендерэнть лангс, каявоманть ало аштиця традиционной бракось, чачтамотнень аламолгадомась, репродуктивной шумбрачинть коряс стакачитне. Теке марто масторлангсонть аламонь-аламонь касы свалшкань питнейчитнень лангс вешемась ды кастови эйкакштнень питнейчись.
«Казть шка!» лувонть коряс чачтоматнень кастомань коряс политикадонть ёвтнесь М.В. Ломоносовонь лемсэ МГУ-нь экономической факультетэнь народонаселениянь кафедрань прявтось Ирина Калабихина. Сонзэ вановтонзо коряс, конат нежедить вузонь ванноматнень-тонавтнематнень лангс, государствань политикантень мереви полавтомс демографиянь енкссо берянь лувтнень.
«Соцкевкстнематне невтить, ломантнень ули мелест эрямс семиясо, ули мелест чачтомс кавто эйкакштнеде аволь седе аламо. Ансяк тетясь-авась, теке марто важодиця. Секскак эряви коллективной од договор, конась топавтсы тетянтень-авантень мелень явоманть, семиянть ды эйкакштнень туртов шканть олякстомтомань туртов важодицянь занятостень полавтневиця режимть. Те улияк «казть шка!» лувось», - тешкстызе Ирина Калабихина.
Мордовиянь Прявтонть Артём Здуновонь пачтямозо алтазель региононь социальной практикатненень - кода совавтомс раськень койтнень-кирдатнень демографиянь политикантень.
Госсоветэнь комиссиянь председателесь тешкстызе, меельце 10 иетнестэ масторсонть ламо эйкакшонь триця семиятне ламолгадыть. Саемга, Московсо ламолгадсть 2,5-ксть. Тень пингстэ демографиянь невтевкстнэ киртявить. Улить субъектт, косо 30% семиятнень арасть эйкакшост.
«Тынь чарькодтядо, кодамо те покш потенциал, - тешкстызе Артём Здунов. - Ды миненек эйкакштнень чачтомадо меленть коряс те потенциалонть эряви кастомс. Ансяк ламо эйкакшонь триця семиятнень коряс? Арась, весе семиятнень коряс. Эрьва семиянтень улезэ вадря эрямс масторсонть. Раськень семянь койтне-кирдатне куш кодамо раськень, ды эрзянь-мокшонь ютксост, свал кортасть ламо эйкакшонь триця семиядо. Невтемакс ёвтасынь эрзянь ды мокшонь валмеревкстнэнь: «эйкакш марто кудось – уцяскав кудо», «ламо эйкакшт – ламо кеняркс». Ансяк ней модась мекс-бути тусь. Миненек эряви весе вийтнень аравтомс сень лангс, штобу те модась велявтоволь».
Мордовиянь Прявтось тешкстызе, семиянть туртов прявт лувось – эрьва эйкакшонть чачтомась улезэ экономикань коряс кемекстазь. Мордовиясо, невтемакс, улить эйкакш марто семиятненень лездамонь малав 40 тевть, свалшкане нолдавить одт – васенце эли омбоце эйкакшонть чачтомсто, студентэнь семиятнень туртов. Аволь умок кемекстазель решения ламо эйкакшонь семиятнестэ эйкакштнень пси ярсамопельсэ андомадост нужачинь критериянть апак лово. Республикась – масторонь вейкине регион, косо нилеце эйкакшонть чачтомсто целанек пекстави ипотекась, васенценть, омбоценть эли колмоценть чачтомсто - каяви пельксэнь-пелькс.
Бути велявтомс «казть шка!» лувонтень, Мордовиясо совавтозь «семиянь чи» - семиянть туртов прявт тевтнень топавтоманть туртов шка.
Сехте прявт лувось, конань лангс явсь мель Артём Здунов, – те эйкакш марто семиянтень улезэ вадря эрьва косо! Парксо, общественной таркасо, покш кенярксчитнесэ ды мероприятиятнесэ, эрьва косо улевельть пеленальной нупальть, авань ды эйкакшонь нупальть институттнэсэ, предприятиятнесэ, косо эйкакшонтень мереви ярсамс, теемс урокт тетятнень-аватнень учомсто. Покш талика саить корпоративной программатне.
«Те весе путы покш тешкс ломантнень чарькодемаст лангс. Эряви шождалгавтомс эйкакш марто семиятненень, сехте пек ламо эйкакшонь, эрямонь весе тевтнень. Те лезды тенек велявтомс моданть. Ды те цетавксонть минь нейсынек курок!» - тешкстызе Госсоветэнь комиссиянь председателесь.
Истя жо аволь умок Мордовиясо теезь Республикань Прявтонть пингстэ Семиянь совет – тов совасть семиянь паратне, важодемань династиятне. Советсэнть семиятнень ютксо чачтомань вейсэнь коэффициентэсь 4+.
Артём Здунов тешкстызе вейсэнь лувонть, конась важоди Госоветэнь комиссиянь «Семья» ёнксонть коряс комиссиясонть: «Бути минь кортатано политикадонть, эряви явомс мель весенень – регионтнэнень, предприятиятненень, вузтнэнень, шумбрачинь ванстомантень, тевс нолдамс инфраструктурань теемасо башка ёнкстнэнь. Эряви чарькодемс, кодат регионтнэ важодить, конатне арась, кодат тевтне лезэвть, конат аволь пек. Те лезды кепедевемс лиятненень».
Демографиянь тевень витеманть туртов прявт лувокс, Научно-общественной экспертизань институтонь генеральной прявтонть, РФ-нь Общественной палатань Советэнь членэнть, РФ-нь ОП-нь демографиянь, семиянь, эйкакштнень ды семиянь свалшкань питнейчитнень ванстомань коряс комиссиянь председателенть Сергей Рыбальченконь ванновтонзо коряс, карми масторсонть чачтоматнень ламолгавтомась. Сон ёвтнесь Сахалинской областень вадря опыттэнть ды семиянь путовкстнэнь системань ладямонь лувдонть.
Эрицятнень репродуктивной шумбрачист ванстомадо кевкстеманть токшизе Н. А. Лопаткинэнь лемсэ Урологиянь ды интервенционной радиологиянь НИИ-нь – Россиянь Минздравонь «НМИЦ радиологии» филиалонь прявтось Олег Аполихин. Сон невтизе проектэнть – од семиянь сертификатонть. Региононь демографиянь политикань те инструментэсь лезды шаштомс од мирдтнень-нитнень мелест эйкакштнень чачтомантень.
Д.И. Менделеевень лемсэ Демографиянь политикань институтонь исполнительной прявтось Иван Ефимов тешкстызе кемекставозь видечинть – ламо эйкакшонь семиясь кармазо нормакс ды модной трендэкс. Демографиянь вадря решениятнень тееманть туртов эрявить корпоративной политикась ды государстванть, бизнесэнть ды обществанть вейсэнь бажамост.
Сессиянть лувсо опыттэнть истя жо ёвтнесь Кировонь областень представителесь, омбо масторонь тевтнеде ёвтнесь Аргентинань экономикань докторось Сильвия Лондон.
Мордовия Республикань Прявтонь Пресс-службась