Сундерьковонь 17-це чистэ культурань отраслянь представительтнень ды ероков од ломантнень марто вастовсь Мордовиянь руководителесь Артём Здунов.
«Минек музейтне, музыкань искусствась лездыть ломанентень ладямс питнейчитнень лувонть. Сон ушодови семиясто, кемекстави, истя жо искусствань школатнесэ ды музыкань школатнесэ. Те минек раськень идентичностень, минек государственностень юр, – пшкадсь пурнавозетненень региононь руководителесь. – Покш сюкпря тенк – тынк шкинемань тевдеемась, эрьва чинь важодемась лездыть кастомс-тонавтомс ломанть, конат вечксызь эсь Тиринь масторонть».
Мордовиянь Прявтось тешкстызе: культурань институттнэ - театратне, музейтне, музыкань школатне, кандыть искусства ломантнень юткс, сехте прявтось – теить обществанть седе виевекс.
Сюкпрянь башка валт евтазельть Эрьзянь лемсэ изобразительной искусствань музеень важодицятнень лемс скульптуронть сюпачинзэ ванстоманть кисэ. Алкукс, самай Степан Дмитриевич кепедизе эсь модань культуранть, кармавтызе масторлангонть содамс эрзянь-мокшонь енксстонть. Ине мастерэнть тевезэ ули поладозь.
Тешкстазель, целанек республикань неень шкань музейтне – те краеведениянь ды искусствоведениянь юр. «Культура» национальной проектэнть вельде сынь одкстомтовить, явови покш технологичной оборудования, пештевить фондтнэ. Эрязасто виевгавтови грантонь тевдеемась, анокставить од практикат ды культурань проектт.
«Течи тей пурнавсть сетть, кить башка ендо марясызь эрямонть, маштыть тееме ды ванстомо вадрянть ды мазыенть – те башка ерокчи, конань максы Пазось аволь стяко, а штобу теемс ды пачтямс масторлангонтень мезе-бути вадря. Эдь Пазонть лемтнень ютксо вейкесь – мазычи!» – мерсь Мордовиянь Прявтось.
Мордовиянь Правительствань Председателень Васенце полавтыцясь Галина Лотванова евтнесь республикань культурань сферасонть од енкстнэнь виевгавтомадост. Сон истя жо тешкстызе, «Россия» раськеютконь выставкасонть, конась ютавтови ней Московсо, культурань пельксэсь саи башка тарка. Мордовиясь невтсы эсензэ башка енксонзо ды культурань сюпавчинзэ сундерьковонь 30-це чистэ, минек региононь чистэнть. Сон тердинзе вастовомантень пурнавозетнень те чистэнть молемс минек республикань павильононтень.
Мордовиянь Артыцятнень вейсэндявксонтень ды Россиянь Артыцятнень вейсэндявксонтень совицясь Анатолий Баргов евтнесь, Мордовиянь артыцятне ды артисттнэ – сехте виевть: регионъютконь ды раськеютконь выставкатнесэ ды пелькстамотнесэ сынь саить сехте покш наградат.
МР-нь Искусстватнень заслуженной деятелесь Василий Родионов явсь мель лезксэнть лангс, конань республикань руководителесь яви велень художественной самодеятельностень коллективтненень.
Полина Курышкина евтнесь Эйкакшонь культурань форумсонть улемадонзо. Россиянь Минкультось кирдизе сонзэ «Библиосмена» проектэнть – библиотекатнесэ арсеви теемс эйкакштнень туртов сменат, косо сынь теевить содавиксэкс сермадеень профессиянь салавачитнень марто ды тонадыть нолдамо тевс литературань коряс ерокчитнень.
Артём Здунов кирдизе ушодксонть: «Ней эряви невтемс проектэнь покш цетавкст!»
Форумонь эште вейке участницась Арина Луконина, сон аноксты Мордовиянь «кенярксчинь артыцянть» Федот Сычковонь сюпачинзэ коряс проект, тешкстызе: «Вадря, улить истят форумт, конат лездыть виевгавтомс эйкакштнень ерокчист».
Од ломанень симфонической оркестрань музыкантось Юнир Невлютов аволь ансяк евтнесь эсь изнявкстнэде, истя жо невтинзе сынст, налксесь саксофонсо.
«Сюкпря тенть: тевесь – куш-кодат валтнэде седе вадря», – мерсь Мордовиянь Прявтось.
Советской Союзонь Героенть М.П. Девятаевень Кудонть-музеенть од ломантнень марто важодемадонзо евтнесь сонзэ руководителесь Наталия Бегаева. Артём Здунов тешкстызе, те енксось пек эрявикс, ды евтась сюкпря минек героической земляконть сюпачинзэ ванстоманть кисэ.
«Волонтеры культуры» куншкакуронть виевгавтомань арсематнеде ды проектэнь тевдеемадонть евтнесь республикань краеведениянь музеень прявтонь полавтыцясь Татьяна Червячкова.
Республикань содавикс композиторось Нина Кошелева тердизе региононь Прявтонть сы иень панжиковсто Мордовиянь композитортнэнь 7-це фестивалентень, косо эсь произведенияст невтсызь од тешттнеяк. Артём Здунов покш мель марто кирдизе тердеманть, тешкстызе: фестивалентень понгост аволь ансяк республикань эрицятне, истя жо минек земляктне, региононь инжетне.
Вастовоманть прядовомга явшевсь изобразительной искусствань ды музеень тевень коряс Степан Эрьзянь лемсэ премиясь. Сонзэ лауреатокс кармасть артыцятне Александр Шадрин ды Оксана Рощина, чувтосто керсемань коряс мастерэсь Александр Рябов, музеень важодицятне Анжелика Романова, Наталия Бегаева, Екатерина Неяскина, Анна Занкина ды Татьяна Чиндяйкина.
Вадря коекс кармась музыкань искусствань енкссо Мордовия Республикань Прявтонь премиятнень явшемась. Тедеде сонзэ лауреатокс кармасть Саранскоень Л.П. Кирюковонь лемсэ музыкань училищань преподавательтне Светлана Венчакова, Андрей Пивкин ды Владимир Ширипов, истя жо Темниковань енксонь Культурань куншкакуронь художественной руководителесь Иван Сургаев.
Артём Здунов истя жо евтась поздоровт юбилеенть кувалма Мордовиянь заслуженной артыцянтень Валентина Козлованень. «Карматано седе товгак важодеме ды бажамо, славамо тиринь республиканть», – мерсь сон.
Мордовия Республикань Прявтонь пресс-службась