Мордовиянь Прявтось, каземань церемониянтень пурнавозетненень Конституциянь Чинть кувалма поздоровонь евтамсто, тешкстызе: «Минек масторонь виесь свал ульнесь весе раськетнень вейсэндявомасо. Конституциясь тешксты государствань касомань-кепетемань енксонть, пешти сонзэ истямо смустесэ, кода суверенитет, историянь алкуксчи, семиянь свалшкань питнейчить. Прявтось, эрьва ломанесь вечкезэ тиринь моданть, ломантнень, конат тесэ эрить, явоволь мель лия раськетненень, текень пингстэ ванстоволь эсензэ государствань мельтнень-ванновтнень, эсензэ ломантнень, косо бу сынь авольть уле», – мерсь сон.
Артём Здунов евтась сюкпря весенень, кие алкуксокс важоди, максы республикантень ды масторонтень весе виензэ ды ерокчинзэ. «Кие-бути эзь саво – мон телефононь коряс течи евтынь поздоровт Николай Васильевич Орловнень - «Единая Россия» партиянь старейшинантень, сонензэ течи топодсть 85 иеть. Сон казезь Трудонь Якстере Знамянь орденсэ, «Знак Почета» орденсэ, ютась важодемань покш ки. Вана истят минек ветерантнэ, минь кирдтяно сынст кувалма покш каштанчи!» – мерсь республикань Прявтось.
Региононь руководителесь евтась башка сюкпря специальной военной операциянь участниктненень. «Те геройть, конат аштить минек государствань мельтнень-ванновтнень ванстомасо. Ней ламолгадсть бажамотне полавтомс Россиянь историянть, лиякс невтемс ламот тевтнень ды факттнэнь, секскак эряви важодемс од ломантнень марто, евтнемс прявт питнейчитнеде, конат тешкстазь Россиянь Федерациянь Конституциясонть. Минек вейсэндявомась, анокчись аштемс раськень мельтнень-ванновтнень кисэ, максомс виде каршо валт шкань вешематнень лангс, лездыть Россиянтень свал кадовомс масторлангонь ине державакс. Минь – Россия! Ды свал карматано сонзэ марто ды минек Президентэнть марто!» – мерсь республикань руководителесь.
Мордовиянь Прявтось явшесь пурнавозетненень государственной покш наградат. РФ-нь Президентэнть Указонзо коряс «За безупречную службу» отличиянь тешксэ казезь Лямбирень муниципальной райононь администрациянь аппаратонь руководителесь Нина Кочетова.
«За заслуги перед Отечеством» II степенень орденэнь медальть явшезь Росгвардиянь боецтнэнень.
Лука Крымскоень медальтнесэ казезь Рузаевкань ЦРБ-нь медицинань лезксэнь куроксто явомань врачось Серафима Ганьшина, 2№ поликлиникань стационаронь заведующеесь Ирина Ермакова ды 5№ Республикань клинической больницянь медицинань сестрась Татьяна Камаева.
Мордовия Республикань Славань II степенень орденсэ казезь Орданьбуень светотехнической заводонь общественностенть марто сюлмотнень коряс ды властень муниципальной органтнэнь марто важодемань коряс прявтось Владимир Кудашкин.
Мордовиянь од ломантненень Артём Здунов макссь прявт документ – Россиянь Федерациянь гражданинэнь паспорт.
Конструкциянь Чинть кувалма поздоровт истя жо евтасть МР-нь Госсобраниянь Председателесь Владимир Чибиркин ды МР-ва прявт федеральной инспекторось Михаил Сезганов.
Мордовия Республикань Прявтонь пресс-службась