2023 иестэ важодемань невтевкстнэде ды 2024 иентень тевтнеде прявт пачтямонть марто пшкадсь райононь прявтось Юрий Голов. Васняяк сон евтась сюкпря земляктненень СВО-нь участниктнень ды сынст семиятнень кирдемаст кисэ. Маштовозетнень ледстизь чатьмонемань минутасо.
2023 иесь райононть туртов ульнесь вадря, ламо теезь. Строязь Берсеневка велесэ канализациянь-насосонь од станция, водоотведениянь сетть, Покш Елховкасо витнезь эйдень кужось ды велень клубось.
«Модернизация школьной системы образования» проектэнть лувсо педе-пев витнезь Александровской ды Большеелховской средней школатнень зданиятне.
«Развитие водохозяйственного комплекса РМ» госпрограмманть коряс поладови Лямбирь велесэ Сухая Пензятка леенть лангсо гидротехнической сооружениянь витнемась. «Комплексное развитие сельских территорий» госпрограмманть коряс райцентрасонть зярыя куротнева строязь автомобилень кить, вейсэнь кувалмосо 8,6 вайгельбеть. Весемезэ велень территориятнень виевгавтомань программанть коряс явозь 363,7 млн целковойть.
«Содействие» федеральной проектэнть коряс витнезь автомобилень китнень вете вайгельбеть Александровкань, Берсеневкань, Лямбирень, Кривозерьянь велень поселениятнесэ, «Безопасные и качественные дороги» нацпроектэнть коряс – региононь смустень китнень малав 17 вайгельбеть.
Мордовиянь Прявтось тешкстызе муниципалитетэнь покш потенциалонть ды мерсь: «Минь свал лездатано Лямбирень енксонтень». Социально-экономической прявт невтевкстнэнь топавтомантень икелепелень питнень максоманть коряс районось саи нилеце тарка республикасонть. Те вадря цетавкс. А вана налогонь ды аволь налогонь доходтнэнь касоманть эряви кепедемс.
«Доходонь юронь кемекстамонть туртов тынк возможносттне улить, – мерсь Артём Здунов. – Велень хозяйствань кавто покш предприятиятне («Октябрьская» агрофирмась ды «Атемарская» птицефабрикась) поладыть касомо-кепетеме – 1 млрд целковойтнеде седе ламо инвестицият, вете проектт. Теде башка, минь тейтяно районсонть экономикань башка зона. Весе таркатнесэ, косо тееви ОЭЗ, – моли покш касома».
Прявт проектэсь – Атемарсо межмуниципальной комплексэнь ды отходтнэнь обработкань коряс полигононь строямось. Мордовиясь кармась Россиянь ниле регионтнэстэ вейкекс, конатненень явозь неть тевтнес РФ-нь Правительствань специальной грант. Те карми неень шкань, экологиянь коряс сэтьме объект, конасонть теевить вадря зарплата марто малав 200 важодемань таркат.
Свалшкань ванновт ало, кода тешкстызе Мордовиянь Прявтось, улезэ Россиянь Федерациянь Президентэнть Владимир Путинэнь кудотнень догазификациянь коряс кармавтоманзо топавтомась. «Минь омбоцеть Россиясо догазификациянть коряс. Лямбирень енкссо ламо важодема», – мерсь Артём Здунов.
Теде башка, 2025 иестэ газоснабжениянь ды газификациянь программанть коряс арсеви ветямс газ райононь 6 эрямонь пункттнэс – те 300 кудот.
Башка ванновт ало – школатнень педе-пев витнемась. Те федеральной программанть коряс 2026 иестэ витнесызь Пензяткань ды Первомайской школатнень. «Бажатано теемс сынст седе икеле, – тешкстызе республикань руководителесь. – Эряви витнемс эште сехте аламо кавто школатнень (Лямбирень 2№ СОШ-сь ды Атемаронь СОШ-сь) ды ниле эйдень кужотнень. Карматано анокстамо башка яволявтомат».
Тедеде арсеви панжомс «Касомань точкат» колмо школатнесэ («Лопатинская ООШ» МОУ-сь, «Татарско-Тавлинская ООШ» МОУ-сь, «Черемишевская ООШ» МОУ-сь). Кривозерьевской и Саловской школатнень туртов рамави компьютерэнь оборудования, арсеви витнемс спортзалонть Берсеневкань школасонть.
Башка мель, кода тешкстызе Артём Здунов, эряви явомс шумбрачинь ванстомань объекттнэнень. Сы иенть прядовомс эряви педе-пев витнемс Лямбирьсэ поликлиникань зданиянть. Эряви поладомс важодеманть фельдшерско-акушерской пункттнэнь строямонть, витнеманть ды полавтоманть коряс. Ламотне юткстост а ладить неень шкань вешематненень. Башка ванновт алов Мордовиянь Прявтось саизе Кривозерье велесэ амбулаториянь коряс тевенть.
Талновтыця весе кевкстематнень Артём Здунов кармавтынзе ванномс министратненень, конат ульнесть сессиясонть. Вейкеяк кевкстемась а кадови каршо валтомо. Республикань Прявтось кармавтсь райононь руководствантень покш мель явомс эрицятнень пшкадематненень.
Мордовия Республикань Прявтонь пресс-службась