Мордовиянь тонавтыцятне - те профессиянть вечкиця ломанть, кить кемевикст долгонтень, тиринь масторонь алкуксонь патриотт - республикасонть эйстэст 15 тёжат. «Истямо кеме армиянть пингстэ, минь кемтяно вандынь чинтень», - тешкстызе республикань Прявтось.
Тедеде минек тонавтыцятне таго невтизь эсь покш профессионализмаст федеральной уровнясонть, вадрясто невтизь республиканть профмастерствань пелькстамотнесэ. «Минь масторонть келес васенцеть ёроков ломантнень вешнемань ды редямонь коряс!» - мерсь Артём Здунов.
Мордовиянть пельде Школасо тонавтницятнень весероссиянь олимпиадань меельце пельксэнь участниктнень ламочись малавикс федеральной смустень оштнень невтевкстнэнь марто.
Республикань Прявтось ёвтась поздоровт тонавтыцятненень покш цетавкстнэнь кувалма, ёвтась сюкпря эсь профессиянтень вечкеманть кисэ. Меельце иетнестэ Мордовиясо теезь пек ламо неень шкань ды сэтьме тонавтомань лувонь тееманть коряс. Вадрясто топавтови педе-пев витнемань покш программась. Витнезь школань 48 зданият, пеледест ламотне - велетнесэ. Маласо кавто иетнестэ одкстомтовить школань 45 зданият, 12 эйдень кужот ды техникумтнень 10 зданият. Истят строямонь-витнемань тевть Мордовиянь образованиянь системасонть зярдояк арасельть.
Поладови ошонь томбале эйкакшонь лагерьтнень инфраструктурань одкстомтомась. Весемеендо витнезь уш ниле лагерьтне, сынст ютксто кавтотне кармасть иень перть важодицякс.
Артём Здунов ледстинзе минек Президентэнть валонзо: «Сехте стака ды сехте ответственной важодемась – эйкакштнень марто важодемась». Секс мекс самай эйкакшпингстэ путовить питнейчитне, конатнень марто ломанесь моли эрямованть. Те важодеманть васенце таркасо - семиясь ды школась.
Башка тешкстызе республикань Прявтось семиянь ветямонь ды патриотической воспитаниянь программатнень эрявиксчинть. Тесэ покш лезкс тонавтыцятненень явить СВО-нь участниктне - сынь кармасть кенярксчинь мероприятиянь почетонь инжекс.
Мордовиянь Прявтось явшесь республикань сехте вадря педагогтненень заслуженной наградат. РФ-нь Президентэнь Почетонь грамотасо казезь Ероков эйкакштнень туртов республикань лицеень физикань тонавтыцясь Виталий Радайкин.
Масторонь Президентэнть благодарностьсэ тешкстазь МР-нь образованиянь министрась Елена Солдатова.
Масторонь Президентэнь премият максозь Кочкуровань школань тонавтыцянтень Валентина Герасимованень, Ероков эйкакштнень туртов республикань лицеень тонавтыцянтень Ольга Давыдованень, Ташто Шайговань школань тонавтыцянтень Михаил Ошкиннэнь, Ковылкинань енксонь 1 № гимназиянь тонавтыцянтень Раиса Родькинанень, Советской Союзонь Героенть М.П. Девятаевень лемсэ «Высота» 15 № Тонавтомань куншкакуронь тонавтыцянтень Екатерина Чугунованень.
Мордовиянь Прявтонь премият 2 млн целковойтнень покшолмасо - Саранскоень политехнической техникумонтень ды Краснослободскоень аграрной техникумонтень.
Мордовиянь Прявтонь премиятнесэ тешкстазь школань 25 тонавтыцят, эйдень кужонь 10 воспитательть, истя жо профессиональной тонавтнемань организациятнень преподавательтне ды производственной тонавтомань мастертнэ.
Залонтень весе пурнавозетненень казсть цецят республикань Прявтонть пельде. Мордовиянь государственной филармониясь жо анокстась тонавтыцятнень туртов концертэнь мазый программа.
Мордовия Республикань Прявтонь Пресс-службась