«Россиянь государствань тежа иень историясь пештезь минек воинтнэнь ине изнямосост – тенесэ масторонь виесь. Минь сюконятано ветерантнэнь икеле, конат невтизь весе масторлангонтень Чачома масторонть лемс ратной ды важодемань ине тевтнень. Покш ризксэс, минек марто кадовить яла седе аламо фронтовикть. Минек сантнэсэ чуди геройтнень-изницятнень вересь, Ине Изнямодонть валдо ледстнематне эрить эрьва семиясонть. Мон евтан сюкпря весенень, кие ней передовойсэ, мужестванть ды Тиринь масторонтень кемевиксчинть кисэ. Сюкпрянь башка валт боецтнэнь семиятненень, волонтертнэнень, весенень, кить кирдить специальной военной операциянь участниктнень», – мерсь региононь лидерэсь.
Артём Здунов тешкстызе: Изнямонтень кемемась – Вооружённой Вийтнень од чачось, конась кемекстазь Верховной главнокомандующеенть, Россиянь Президентэнть Владимир Путинэнь тевдееманзо вельде. Войскатнес пачтяви икеле молиця вооружения, техникань неень шкань образецт. Ютавтови покш важодема армиянь перевооружениянть коряс. Башка каштанчи веши се, што Мордовиясь теи эсь путовксонзо масторонь обороноспособностень кемекстамонтень.
«Мордовиясо поладови важодемась минек земляктнеде ледстнематнень ванстоманть, воинтнэнь мемориалтнэнь вадрялгавтоманть, патриотической воспитаниянть коряс. Покш перспективат тенесэ панжить ламот проекттнэ, конатнень яволявтынзе минек Президентэсь. Вейсэндявомасонть, минек видечинтень кемемасонть, военнослужащейтнень ды Президентэнь весераськень кирдемасонть – масторонь ине виесь. Изнямось карми минек», – мерсь Мордовиянь Прявтось.
Мероприятиянтень весе пурнавозетненень истя жо пшкадсь Мордовия Республикань военной комиссарось Игорь Тихомиров. Сон евтась сюкпрянь валт республикань руководствантень воинской часттнень ды гарнизононь организациятнень икеле аштиця тевтнень витемасо лездамонть ды путовксонть, минек боецтнэнь ды сынст семиятнень кирдемаст кисэ. Арсесь Отечествань ванстыцятненень шумбрачи, вийть ды изнявкст Россиянь лезэс аволь шожда тевсэнть.
Кенярксчинь лувсонть явшезь государственной наградат. Сынь максозь СВО-нь ветерантнэнень, кить честь марто топавтызь эсь воинской долгост. Тешкстазель сеттнень важодемаст, кить невтсть покш профессионализма важодемань таркатнесэ. Благодарность истя жо явшезь сеть цератнень тетятненень-аватненень, кить ютыть служба Россиянь эрьва кодат енкстнэсэ.
«Покш лезксэсь, конась явови тенек, максы вийть. Цератне содыть, сынст семиятненень явови мель. Ды минь кемтяно, тевесь, конань путызе Верховной главнокомандующеесь, ули топавтозь!» – мерсь каршо валсонть боевой тевдеематнень ветеранось, специальной военной операциянь участникесь Николай Кочегаров.
Кенярксчинь мероприятиясь поладовсь концертсэ.