Выставкань-форумонь панжомань церемониясь ушодовсь покш флешмобсонть, мейле поладовсь «1000 первых» спектаклясонть ушонь прявт сценасонть.
Мордовиянь Прявтось Артём Здунов панжизе выставкасонть минек республикань стендэнть. Стендэнть куншкасо – Ине чувто, республикань тешкс. Ине чувтонть ундоксонзо – те историясь ды койтне-кирдатне. Недьксэсь – те минек ломантне, конатнень кувалма минь кирдтяно покш каштанчи. Лётчикесь, Советской Союзонь Героесь Михаил Девятаев, а изнявиця адмиралось Фёдор Ушаков, Патриархось Никон, масторлангонь келес содавикс скульпторось Степан Эрьзя, кенярксонь артыцясь Федот Сычков. Тесэ мереви «совамс» эрзянь-мокшонь раськень масторонтень, варчамс раськень оршамопельтнень эли ванномс республикань содавикс таркатнень.
Республикань стенденть панжомасо ульнесь «Варма» Мордовиянь этно-арт-театрась – художественно-шкинемань тевдееманть коряс раськеютконь ды весероссиянь ламот фестивальтнень изницясь ды призерось. «Вармань» арт-коллекциясь тееви мокшотнень ды эрзятнень раськень оршамопельтнень лангс нежедезь, те модельертнэнь, визажисттнэнь, хореографтнэнь, режиссертнэнь вейсэнь важодемась.
Стендсэнть эрьва чистэ карми ламо мельстуиця – кармить евтнеме региононь изнявкстнэде ды эрзянь-мокшонь лия енов а молиця культурадонть: сон музыкасо, кельтнесэ, эрзятнень ды мокшотнень раськень оршамопельтнесэ, кедьчелькев ломантнень важодевкстнэсэ. Весе масторонть келес содавикст Тавлань чувтонь налшкетне, Орозбиень понань кемтне, Теньгушевань семицветкась.
Мордовиясь содавикс тантей ды лезэв ярсамопельтнесэ. Минь сайтяно васенце тарка масторсонть алтнэнь производстванть коряс, колмоце тарка – ловсонь производстванть коряс, нилеце – сывелень производстванть коряс.
Мордовиясь – масторсонть лидер органической сокамонть-видеманть коряс. Республикась топавты масторонь лекарствань безопасностенть – нолды субстанцият од антибиотиктнень, противовирусной средстватнень, пек эрявикс лекарстватнень туртов. Советской шкатнестэ саезь Мордовиясь ульнесь ды кадови валдонь, светотехнической промышленностень, силовой электроникань куншкакурокс. Минь сайтяно васенце строчка промышленной вагоностроениясонть, ЕврАзЭС-сэ оптической волокнань вейкине производительть. Минек ули лия енов а молиця производства – мореной тумонь таргамось ды обработкась.
«Минь вадрясто яволявтынек эсь прядонть «Россия» выставкасонть, – мерсь стендэнть панжомсто Артём Здунов. – Евтан сюкпря весенень тей самонть кисэ. Минь карматано важодеме вете ковт, арсеме од, тыненк туевель мельс. Садо минек павильононть варштамо ды туинк ялганк».
Мордовиянь лидерэсь башка тешкстызе, выставкась-форумось анокстазь Россиянь Президентэнть ушодксонзо коряс, ды алкукс лия енов а молиця.
«Школасо тонавтницятненень эряви улемс тесэ – вейке самось евтни седе ламо историянь, географиянь, экономикань учебниктнень коряс», - мерсь Артём Здунов.
ВДНХ-со выставкась учи тынк – сон карми важодеме эрьва чистэ, понедельникте башка. Совамось – питневтеме.
Мордовия Республикань Прявтонь пресс-службась