Мордовиясо премиянь региононь пельксэнь, конась ютась аштемковонь 1-це чистэ саезь медьковонь 30-це чис, участниктнень юткс понгсть республикань образованиянь, промышленной ды технологической предприятиятнень, аволь коммерческой организациятнень важодицятне. Умарьковсто кочказь региононь 9 изницятне кото номинациятнесэ: «Технологический лидер», «Лучший наставник», «Молодой специалист», «Семейные трудовые династии», «Совет ветеранов», «Трудовое патриотическое воспитание».
Лауреаттнэнень поздоровт ёвтась республикань Прявтось, «Единой Россиянь» региононь отделениянь секретаресь Артём Здунов. Сон тешкстызе: республикань важодицятнень вельде минек регионось моли икелев. Трудонь ломантне - экономикань стабильностень юр, касомань-кепетемань локомотив, од специалисттнэнь туртов невтевкс. «Пек мельспаро, минь эрятано истямо шкасто, зярдо весе уровнятнесэ ёвтатано поздоровт трудонь ломантненень. Те партиянь вадря проект ды «Кадры» нацпроектэнь прявт тев. Ули мелем ёвтамс мелень явома весенень, кие теи путовкс минек обществанть виевгавтомантень», - мерсь Мордовиянь руководителесь.
Региононь пельксэнь колмо сехте виев изницятне невтсызь республиканть весероссиянь уровнясонть. Мордовиянь Прявтось сынст тешкстынзе башка. Те «Семейные трудовые династии» номинациясонть изницясь Наталья Огорелышева - Краснослободской енксонь Новокарьгинской школань рузонь келень ды литературань тонавтыцясь. Династиянь педагогонь вейсэнь стажось - 208 иеть. «Те семиянть минь парсте содасынек партиянь мероприятиятнень коряс. Екатерина Николаевна Пряхина, Огорелышевтнень династиянь эште вейке представителесь, – «Единая Россия» Партиянь первичной отделениятнень Федеральной советэнтень совицясь», - тешкстызе Артём Здунов.
Финалсо изнямонть кисэ истя жо пелькстыть «Трудовое патриотическое воспитание» номинациясонть изницясь - Покш Березникень Эйкакшонь шкинемань кудонь дополнительной образованиянь педагогось, «Сурский рубеж» военно-исторической клубонь ды «Память» вешнемань отрядонь руководителесь Сергей Косынкин ды «Молодой специалист» номинациясонть изницясь - «Электровыпрямитель» ПАО-нь инженерэсь-конструкторось Кирилл Крисанов.
Сергей Косынкин ёвтась сюкпря республикань Прявтонтень Сурань оборонань рубежень строицятненень мемориалонь тееманть кисэ, ёвтнесь, кода те эряви республикань эрицятнень важодемань подвигест коряс ледстнематнень ванстоманть туртов.
Федеральной уровнясо премиянь изницятнень каземась ютавтови Московсо «Безопасность и охрана труда» (БИОТ-2025) выставканть лувсо, конась юты сундерьковонь 11-14-це читнестэ.
Региононь изницятнень тешкстамосо ульнесь «Выбирай своё» партиянь проектэнь федеральной координаторось, РФ-нь Госдумасо «Единая Россия» фракциянь руководителень полавтыцясь Сергей Морозов, кона ламо иень перть ульнесь Ульяновской областень прявтокс. «Минь паро шабрат, минек вейсэнь историянок, вейсэнь семиянок, вейсэнь аравтлувонок, арсеманок ды цётавксонок. Ули мелем ёвтамс, тынк седе мазый ды оймень эждиця енксонк Московонть коряс. Те - республикань Прявтонть ды ломантнень вельде, конат тесэ эрить ды важодить. Апак кавтолдо мерян: Артём Алексеевич Здунов – масторонь сехте вадря прявттнэстэ вейкесь», - мерсь сон.
Сергей Морозов казсь «Выбирай своё» проектэнь сюкпрянь сертификатт «Рузхиммашонтень», «Электровыпрямителентень», «Байтекс» компаниянтень.
Башка казне – «Лидер национальных проектов» тешксэсь - максозь «Оптикэнерго» КГ-нь прявттнэнь Советэнь председателентень Эвир Боксимернэнь. «Промышленностесэ 66 иетнень важодеманть перть мон получинь ламо казнеть, ансяк те – сехте редявикстнэстэ вейкесь. Монь покш семиям - 22 ломанть: кавто эйкакшт, ниле нуцькат ды 8 правнуцькат. Минь келейгадтано, ансяк мон кортан одтнэнень: демографиянть коряс кармавтомась зярс апак топавто. Ёвтан сюкпря весенень ды башка республикань Прявтонтень монь важодемантень мелень явоманть кисэ. Куш мон чачинь ды касынь аволь тесэ, лован Мордовиянть тиринь ёнксокс», - мерсь сон.
Мордовия Республикань Прявтонь Пресс-службась