«Тынь – минек тонавтыцянок ды наставникенек. Минь вастовтано тынк марто уш свалшкань лувсо. Кенярдан неемс весень тынк шумбракс, парос кемицякс. Евтан тенк сюкпрянь валт се лезксэнть кисэ, конань тынь явтадо специальной военной операциянь участниктненень, сынст семиятненень. Свал кортан тынк ланга», – пшкадсь вастовомантень пурнавозетненень республикань руководителесь.
Артём Здунов тешкстызе, Мордовиясь яви покш мель сыре ломантненень, кевкстематненень, конатнень тешксты ветерантнэнь активесь. Ушодовсь республикань гериатрической куншкакуронь витнемась-петнемась. Медучреждениятнес поладови оборудованиянь путомась, конась эряви сыре ломантненень. Россиянь Социальной фондонть лезксэнзэ вельде республикасонть панжозь Сыре ломанень уш 14 куншкакурот. Тесэ ломантне аволь ансяк кортыть вейкест-вейкест марто, истя жо тенст явовить консультацият пенсионной, социальной, правовой ды медицинской кевкстематнень коряс, тонавтовить компьютерной ды финансовой содамочитнес.
Мордовиянь Ветеранонь советэнь Председателесь Иван Цыганок тешкстызе, организациянтень совить сеть ломантне, конат весе виест ды содамочист максызь ды поладыть максомо республиканть лезэс. «Минь топавтано вейсэнь покш тев: а кадтано ванновтомо минек ветерантнэнь, лездатано тенст эрямонь стака шкатнестэ», – мерсь сон.
Иван Цыганок евтнесь сыре ломанень ковдонть, тешкстызе, сонзэ ютавтомантень вейсэндявсть аволь ансяк районтнэнь ды предприятиятнень руководительтне, истя жо региононь мелень явиця ломантне.
Тешкстазель, ветеранонь активесь эсь тевдеемасонть покш мель яви эйкакштнень военно-патриотической лувсо тонавтомантень-превс путомантень. Малавгали Ине Отечественной войнасо Изнямонь 80-це иесь – сави топавтомс анокстамонь покш важодема, истя жо войнань геройтнень подвигест коряс од ломантнень тонавтомась-превс путомась.
Вастовомантень пурнавозетне – ветеранонь райононь ды первичной организациятнень руководительтне – евтнесть седе, кодамо важодема сыре ломантнень марто ладязь те эли тона районсонть эли организациясонть, кодат стакачить печтить ветерантнэ ды кона изнявкстнэнь кувалма кирдить каштанчи.
Орданьбуень енкссо сайсть мель вельмевтемс городошной спортонть, ветерантнэнь ды спонсортнэнь ярмакост лангс панжсть кеврунго воинтнэнень, кить ютасть служба Германиясо. Райононь пенсионертнэнь цела группась питневтеме лезды фронтонтень: кодыть алтымат, стыть оршамопельть боецтнэнь туртов, ютавтыть ледстнемань акцият. Евтазь талновтыця кевкстематнень ютксто Артём Здунов саинзе ванновт алов больницянь важодеманть ды кортамонь-вастовомань куншкакуронь транспортонь доступностенть.
Ицялонь енкссо сыре ломантнень марто важодемась ладязь вадрясто. Райононь организациясь сайсь шефства живстэ вейкине кадовозь ВОВ-нь ветеранонть лангсо – сон эри ськамонзо, Москов алдо нуцьказо а стувтни, райононь соцзащитась лезды, ансяк ней эряви башка мелень явома.
Вастовомантень пурнавозетне тешкстызь зярыя талновтыця енкстнэнь – предприятиятнень аволь весе руководительтне, депутаттнэ максыть каршо валт ветерантнэнь организациятнень энялдомаст лангс. Текень пингстэ, од ломанень организациятне, мекевланк, кармасть седе ероковокс. Улить вадря невтевксткак: Кадошкинань ветерантнэнь организациянь советэнь председателесь Людмила Рожнова евтнесь, ветерантнэнь энялдомаст коряс свал лезды «Мир цветов» предприятиясь, кшинь панемань предприятиянь ветерантнэнень мелень явоманть саизе предпринимателесь, конась вети те бизнесэнть.
Пурнавозетне кортасть Мордовиянь Прявтонть марто социальной ды медицинской учреждениятнень, куватьс эрямонь клубтнень важодемадост, сыця шкантень ды покш мероприятиятнень коряс арсематнеде.
«Ладямс районсонть сыре ломантнень марто важодеманть аволь стака. Те важодемантень эряви кундамс шкинемань ендо – те кандыяк цетавкст», – мерсь Ицялонь райононь ветерантнэнь общественной организациянь председателесь Нина Васина.
Сыре ломантнень ковось прядовома лангсо, ансяк сиянь иень ломантненень мелень явомась эряви свал. Ськамонт улемась – те валт, конат иляст кандово Мордовиянь ветерантнэнень, теде кортасть течинь вастовомасонть.
Кортамосонть ульнесть Мордовия Республикань Прявтонь ды Мордовия Республикань Правительствань Администрациянь Руководителесь Булат Хайрутдинов ды Мордовия Республикань Правительствань Председателень Васенце полавтыцясь Галина Лотванова.
Мордовия Республикань Прявтонь пресс-службась