Важодемань промкссонть кортасть седе тов вейсэнь тевдеемань весе енкстнэде. Республикантень эрявить техникань ламот видтнэ - пассажирэнь, коммунальной, дорожно-строительной. Весе арсематнень заводось кучсынзе, ды сынь улить ваннозь. Коммунальной ды дорожной техникань пачтямотнень мереви топавтомс лизингень компаниятнень вельде.
Белоруссиянь енксонть пельде тешкстазель, Россиянь рынкась заводонть туртов ашти прявтокс, предприятиянь 65% продукциясь миеви минек масторсонть. Заводонь представительтне истя жо тешкстызь, весе комплектующейтнень, конат икеле рамсевсть омбо мастортнэстэ, ней арсить полавтомс Россиянь производительтнень теевкстнэсэ. Мордовиянь Прявтось Артём Здунов кармавтсь МР-нь промышленностень, наукань ды од технологиятнень министрантень Игорь Губайдуллиннэнь анокстамс минек предприятиятнень пельде весе арсематнень, конат улить мельстуицякс Белоруссиянь коллегатнень туртов.
Истя жо кортавсь Мордовиясо заводонь дилерской центрань панжомадо кевкстемась.
Кортамось истя жо мольсь кадратнень анокстамодост. Н.П. Огарев лемсэ МГУ-нь ректорось Дмитрий Глушко тешкстызе, вузонть ули мелезэ ютавтомс практикат ды стажировкат минек студенттнэнь туртов МАЗонть юрсо.
Мордовия Республикань Прявтонь пресс-службась