26 иетнень перть фестивалесь кармась республикань культурань брендэкс, республикань эрицятнень вечкевикс кенярксчикс.
Пелькстамонь весе участниктненень эрзякс ды рузокс пшкадсь Мордовиянь руководителесь. «Вечкевикс ялгат, вечкевикс землякт! Минь одс печтятано минек ойменть, минек седеенть туртов талновтыця минутат. Минь учотано те фестиваленть. Мон кеняркс марто тешкстаса – колмо ды пель тежа артистт примить участия эйсэнзэ. Ды пелест – од ломанть. Те корты: фестивалесь карми эрямо ламо ды ламо иеть. Минь тень туртов тейтяно эрявикс весе условиятнень. Те кода спортсонть. Бути улить эйкакшт, од ломанень организацият – сестэ ули покш вандынь чи. Нама, мельспаро, 500 ламо номерт невтезельть. Зяро шкинема ды ойме тов путозь! Сы иестэ, зярдо минь тердтяно инжеть лия регионтнэстэ (минек тесэ РФ-нь Культурань министерстванть лезксэнзэ вельде ютавтовить покш мероприятият), эряви невтемс прянок весе мазычисэнть, штобу Мордовияв покш мельсэ велявтовольть. Течи ульнесь пек сюпав чись. Минь панжинек фармацевтикань покш производства, минек ламо инженек. Ды текень марто весе бажить понгомс фестивалентень, покш мель марто ваномс раськень шкинеманть лангс, конась чачи ды эри Мордовиясо. Кенярксчи марто! Пазось максозо весенень шумбрачи!»
Республикань Прявтось явшесь казнеть самодеятельной артисттнэнень.
«Открытие фестиваля» номинациясонть фестивалень диплом ды ледстнемань казне максозь Чаунзань енкссто колмоце классо тонавтницянтень Кира Глухованень ды Инсаронь енкссто нилеце классонь тонавтницянтень Матвей Матвеевнень.
«Хранители традиций» номинациясонть диплом ды ледстнемань казнеть – павлопосадской пацят - Артём Здунов казсь Ташто Шайговань енксонь Сыре Теризморгань раськень хоронь артисткатненень.
«Лучший патриотический номер» номинациясонть изнясть Ковылкинань енкссто Игорь Глушичкин ды Игорь Канищев, «Душа фестиваля» номинациясонть – Лямбирень енкссто Артём Мамаев ды Сергей Фудин.
«Национальная песня в новом прочтении» номинациясонть сехте вадрякс кармасть «Мерема» раськень фольклоронь ансамблясь ды «Варма» этно-арт-театрась.
«25 лет на фестивале» номинациясонть диплом ды ледстнемань казне максозь Ельникень енкссто Анатолий Чумаковнень.
Муниципалитеттнэнь ютксо, косо эрить 10 тежадо седе аламо ломанть, фестивалень изницякс кармась Ицялонь енксось, омбоце тарканть саизе Кочкурбуень енксось, колмоценть - Дубенкань енксось.
Муниципалитеттнэнь ютксо, косо эрить 10 тежадо седе ламо ломанть, фестивалень изницякс кармась Рузаевкань енксось, сиянть саизе Ковылкинань енксось, бронзанть – Лямбирень енксось.
«За творчество и профессионализм» специальной дипломось максозь Саранск ошонь округонь шкинемань коллективтненень. «Выставочный проект «Мордовия мастеровая» номинациясонть тешкстазь Краснослободскоень, Темниковань ды Орданьбуень енкстнэ.
Мордовия Республикань Прявтонь пресс-службась