Мордовиясо пурназь 2 млн тоннатнэде седе ламо сюро – те историянь цетавкс ды сехте вадря невтевкс ПФО-нь регионтнэнь ютксо. Эште зярдояк республикань паксятнестэ эзь пурнаво истямо покш норов!
Тедеде «Сырнень сексь-2023» Весероссиянь агропромышленной выставкасонть республикань аграрийтне сайсть 31 казне. Сынст ютксто 25-тне – сырнень. Эрьва медаленть удало покштояк покш важодема, эсь тевентень вечкема, велень вельмевтемантень ды аграрной койтнень-кирдатнень ламолгавтомантень бажамо.
«Минь содатано, мода лангсо важодиця ломанесь ульнесь ды кадови обществань юрокс, сонзэ виевкс ды питнейчикс. Масторонть туртов стака шкатнестэ – сонзэ нежекс. Сюкпря весенень, кие важоди паксятнестэ, велесэ, ферматнесэ, перерабатывающей предприятиятнесэ. Сюкпря тынк важодеманть, Тиринь масторонтень вечкеманть, эсь семиятнень лезэс, Мордовиянть лезэс, минек покш масторонть лезэс важодеме маштоманть ды бажамонть кисэ. Самай тынк вийтнень вельде Мордовиянь АПК-сь пек полавтовсь, кармась алкуксокс конкуренциянь кирдицякс, покш технологичноекс. Башка сюкпря аграрийтненень, конат свалшкане примить участия военнослужащейтненень ды од регионтнэнь эрицятненень гуманитарной лезксэнь кучомасонть. Минек боецтнэнь пекест пешксеть, тенст мезеяк а эряви. Ды те целанек тынк цетавксось», – тешкстызе Мордовиянь Прявтось Артём Здунов.
Течи Мордовиянь иовартнэнь мереви вастомс аволь ансяк Таможенной союзонь лавкатнесэ, истя жо Азиянь, арабонь мастортнэсэ. Республикань аграрийтнень вельде ладяви вейсэнь важодема Китаенть, Беларусиянть, БРИКС-нь мастортнэнь ды СНГ-нть марто. Истя жо сюлмот ладявить Херсонской областенть ды подшефной Каланчакской округонть марто. Тесэ уш микшнить минек продуктт, конатне вечкевить эрицятненень.
Мордовиянь аграрийтненень поздоровт евтасть Россиянь Федерациянь Федеральной Собраниянь Государственной Думань Комитетэнь председателень полавтыцясь Юлия Оглоблина ды Россиянь Велень хозяйствань министерствань Велень территориятнень виевгавтомань департаментэнь прявтонь полавтыцясь Виталий Платонов. Сон ловнызе РФ-нь Велень хозяйствань министрань васенце полавтыцянть Оксана Лутонь пшкадемазо:
«Мордовиянь агропромышленной комплексэсь теи покш путовкс Россиянь продовольствиянь безопасностень топавтомантень. Тедеде, апак вано весе стакачитнень лангс, республикань аграрийтне эште весть невтизь покш профессионализмаст, топавтызь отраслянь свалшкань важодеманть ды добовасть весе прявт енкстнэнь коряс производствань покшолматнень кастома. Сюкпря тынк важодеманть ды вадря цетавкстнэнь кисэ».
Эряви тешкстамс, Мордовиясь целанек топавты внутренней рынканть продукттнэнь прявт видтнэнь коряс.
Кенярксчинь лувонть лувсо отраслянь представительтненень макссть государственной наградат. Аграрийтнень тешкстасть цела семиянек! Семиянь ферматнень ютксо изницякс кармась Ицялонь енкссто Валерий Сидоровонь фермась, сонзэ хозяйствасонть 78 покш сюро ракшат. Нинзэ марто сынь кастыть 11 эйкакшт. Сынь састь тетяст-аваст туртов поздоровонь евтамо.
Истя жо республикань агропромышленной комплексэнь виевгавтомантень покш путовксонть кисэ Мордовия Республикань Славань I степенень орденсэ казезь Темниковань муниципальной райононь «Подсобное хозяйство» ООО-нь прявтось Григорий Самолькин.