Николай Шишкин тешкстызе, исполнительной властень органтнэнь ды региононь прокуратурань вейсэнь важодемась лезды вельмевтемс республикань эрицятнень праваст, ванстомс сынст закнонь мелест-ванновтост. Россиянь Генпрокуроронь полавтыцясь явсь мель талновтыця башка кевкстематнень лангс, сынь сюлмавозь шумбрачинь ванстомань, ЖКХ-нь систематнень важодемаст, уроз-эйкакштненень эрямо таркатнень явоманть марто.
Республикань Прятось эсь кортамосонзо тешкстызе прокуратурань органтнэнь марто вейсэнь тевдеемань эрявиксчинть, истя жо коррупциянь, экономикань ды налогонь преступлениятнень а нолдамонь кевкстематнень коряс. Те важодемась ветяви эрязасто, ламо теезь государственной Финанстнэнь шумбралгавтоманть ды федеральной ярмактнень видестэ тевс нолдамонть мельга контроленть коряс, истя жо национальной проекттнэнь ды программатнень лувсо.
«Поладови важодемась бизнесэнь аволь закононь коряс проверкатнень а нолдамонь коряс, государственной ды муниципальной контракттнэнь, апак теевте ды куватьс строявиця объекттнэнь киртямонь коряс», – тешкстызе Артём Здунов.
Кода тешкстызе республикань прокурорось Сергей Лапин, весе пшти кевкстематнень коряс, конат сыть региононь эрицятнень пельде, моли надзоронь свалшкань сопровождения ды прокуроронь ванномат. Республикань Правительстванть ды депутаттнэнь корпусонть марто удалы топавтомс стака тевть. Невтемакс сон евтызе уроз-эйкакштненень эрямо таркань сертификаттнэнь максомань коряс республикань закононь примамонть. Те пшти стакачись, конась таштавсь республикасонть ламо иеть, сыргавтовсь таркастонзо. 2020 иестэнть саезь, регионось эрьва ие покшолгавты неть тевтнес явовиця ярмактнень. Колмо иетнень перть явовиця квартиратне ламолгавтовсть колмоксть. Ды те лувось, кода тешкстызе Артём Здунов, ули поладозь.
Эрицятненень льготань лекарстватнень явомань кевкстемась истя жо ашти республикань Правительствань башка ванновт ало. Кода тешкстызе МР-нь шумбрачинь ванстомань министрась Олег Маркин, ковидэнь эпидемиядонть мейле редяви сахарной диабетсэ ормалгадомань ламолгадомась. Льготань лекарстватнень полочицятнень ламолгадоманть лангс тешкс путы онкологиянь орматнень ушодовомань пелькссэ редямотнень касомась. Республикань бюджетстэ явовить башка ярмакт неть тевтнень лангс. Ветяви важодема кадратнень а сатомань витеманть ды ФАПтнес оборудованиянь путоманть ды интернетэнь ветямонть коряс.
Эште вейке прявт енксось – региононь коммунальной комплексэнь одкстомтомась. Ютавтовиця важодемадонть пачтясь республикань энергетикань ды ЖКХ-нь министрань тевтнень топавтыцясь Александр Голянин. Истя, Россиянь Минстроев пачтязь коммунальной инфраструктурань одкстомтомань программань проектэсь.
Республикань Образованиянь министрась Елена Солдатова промкссонть пачтясь республикань школатнесэ кавто сменасо тонавтнемадо туемань ды образованиянь организациятнень педе-пев витнемань программанть коряс важодемадонть.
Россиянь Генеральной прокуроронь полавтыцясь Николай Шишкин евтась кемема, региононь руководстванть ды Правительстванть марто вейсэнь важодемась лезды витемс тешкстазь весе стакачитнень.
Мордовия Республикань Прявтонь пресс-службась