«Эйкакштнень ды од ломантнень движениянь теемась иеде икеле кармась тешксэв пельксэкс эйкакштнень покш организациятнень вейсэндявомасо. Минь маштынек ладямс школатнесэ воспитаниянь важодемань система. Течи Васенцетнень движениясь кеместэ эскели Мордовиява. Эйкакштне эсест вийсэ теить вейсэндявкст. Арсян, сехте прявт тевесь – явовтомс од ломантнень мелест. Бути карми мелень явома ды алкуксонь самоуправления – движениясь карми лездамо тенек ламот тевтнесэ», – тешкстызе Артём Здунов.
Евтазель, иенть перть Васенцетнень движениясь токшинзе 4 миллиондо седе ламо ломантнень весе Россиянть келес ды 15 тежадо седе ламо эйкакштнень Мордовиясто. Васенцетнень движениянь наблюдательной советэнть прявтсо Россиянь Президентэсь Владимир Путин. Ацамковонть ушодовомсто сон ютавтсь промкс, косо кемекстазь 2024 иентень Воспитаниянь важодемань программась. «Те прявт документ, конань лангс минь карматано нежедеме. Те важодемантень эряви совавтомс эйкакштнень ды од ломантнень, конат эрить Мордовиясо», – тешкстызе региононь руководителесь.
Артём Здунов евтась сюкпря волонтёронь ды паронь теемань движениятненень СВО-нь туртов посылкатнень пурнамонть кисэ, тешкстызе, те невтевкс лиятнень туртов.
Региононь руководителесь тешкстызе, Семиянь иестэнть, конань яволявтызе масторонь Президентэсь 2024 иестэнть, башка важодема эряви ветямс семиянь вейсэндявкстнэнь марто, истя жо «Россия — страна возможностей» Президентэнь платформанть лувсо. Башка мель улезэ явозь грантонь пелькстамотненень.
«Минь аволь беряньстэ важодинек грантонь повестканть коряс тедеде. Миненек кемить, минь киньгак эзинек маня – эряви нолдамс тевс те юронть, явовтомс региононтень ярмакт», – тешкстызе Мордовиянь Прявтось.
Эйкакштнень ды од ломантнень общественно-государственной движениянь региононь кураторось Соня Погосян тешкстызе: Мордовиясь сайсь виев тарка Движениянь виевгавтоманть коряс, республикань эйкакштне эрязасто невтезь Васенцетнень движениянь весе проекттнэсэ. Сон евтась сюкпря региононь руководствантень Движениянь кирдеманть кисэ, республикасто эйкакштненень – «Россия» выставкасонть важодеманть кисэ. «Минь тейтяно движения эйкакштнень туртов ды эйкакштнень марто вейсэ!» – мерсь Соня Погосян.
Тедеде Васенцетнень движениянть лувсо ладязь наставничествань пек эрявикс важодема, сон поладови сы шкастонтькак. Башка мель явови патриотической ды волонтерской тевдеемантень. Республикасонть важодить 56 школань медиа-центрат.
«Вадрясто ютась Мордовиясо Движениянь важодемань васенце иесь, – тешкстызе Васенцетнень движениянь региононь отделениянь председателесь Дарья Радайкина. – Республикасонть теезь 314 первичной организацият, Мордовиясь совась ТОП-30 субъекттнэнь юткс Движениянь виевгавтоманть коряс. Миненек эряви кастомс эйкакшт, конат кармить содамо ды вечкеме Россиянть, ды сюлмасызь сонзэ марто эсь вандынь чист».
Васенцетнень движениянь кемекстамонь коряс важодемась ветяви региононь Образованиянь министерстванть, Од ломантнень тевест коряс Госкомитетэнть, муниципалитеттнэнь, общественной ды духовной организациятнень марто вейсэ. Республикань весе школатнесэ важодить прявтонть воспитаниянь важодемань коряс советникть, теезь 24 куншкакурот. Мордовиянь Образованиянь министрась Елена Солдатова тешкстызе, топавтовить эрьва кодамо енксонь ламо проектт ды акцият.
Сыця иентень прявт тевтнень ютксо вейкесь – совавтомс Движениянтень стака обуця марто эйкакштнень, сеттнень, кинень эряви покш мелень явома. «Вейсэ минь тейсынек весементь ды натой седеяк ламонть!» – кемевтсь ведомствань руководителесь.
43№ лицеень тонавтницясь Денис Рузанов евтнесь РДДМ-нь I инекужосонть улемадонзо. Васенцетнень движениянь гранттнэнь топавтомадост евтнесь республикасонть «Знание» обществань филиалонь прявтось Олег Зарубин. 7№ лицеень прявтонть воспитаниянь ды эйкакшонь общественной организациятнень марто вейсэнь тевдеемань коряс советникесь Юлия Караченцева тешкстызе: Васенцетнень движениясонть улемась макссы од ломантненень покш возможностть.
Республикань ероков эйкакштнень туртов лицеень тонавтницясь Егор Петряев евтнесь эсь опыттэнть – сон «Большая перемена» Весероссиянь пелькстамонть изниця. «Минь а аштетяно вейке таркасо! Весемесь топавтови Васенцетнень движениянть марто», – тешкстызе сон. Егор евтась мель ютавтомс вейсэнь педсовет, конасонть педагогтненень невтеви школасо тонавтницятнень общественной тевдеемань эрявиксчись.
Эсь арсеманзо евтынзе Мордовия Республикасо Эйкакштнень праваст коряс уполномоченноесь Наталья Юткина – ероков од ломантнень эряви вейсэндямс стака обуця эйкакштнень марто важодемантень.
Артём Здунов кирдизе те ушодксонть. Сон истя жо кирдизе Ельникень енксонь местной отделениянтень совицянть Мария Курикинань проектэнть: вельмевтемс од натуралисттнэнь движениянть.
Промксонть прядовомга эсь мелензэ евтынзе Саранскоень ды Мордовиянь митрополитэсь Зиновий: «Течи мари эсь прянть васенцетнень юткс кандовоманть. Евтан мель весенень тенк вейсэндявомс духовной ундокстнэнь ды койтнень-кирдатнень, нравственной ды семиянь питнейчитнень вельмевтемантень, конатне, кеман, лездыть витемс ламо социальной стакачить».
Мордовия Республикань Прявтонь пресс-службась