«Кенярксчись, нама, седейшкавань, – пшкадсь республикань руководителесь Мордовиянь аватненень. – Ды кода мерсь минек Президентэсь, сон алкуксонь. Сон умок уш артовсь минек флагонь колмо тюстнэсэ».
Артём Здунов тешкстызе, авась – эрьва ломаненть эрямосо сехте прявт пелькстнэнь юр – чачомась, эрямонь кинь кочкамось, од семиянь пурнамось: «Ававтомо мезеяк а лиси, секс мекс аванть тевезэ – вечкемс ды улемс вечкевиксэкс».
Тешкстазель, ававтомо арась обществасонть важодемань тевдеемань вейкеяк енкс. «Мон аволь весть кортынь, а кода важодемс тейтерь-ававтомо – тынь нейтядо сень, мезе а нейтяно минь, тынк ули ежомарямонк, конань максызе перть пельксэсь. Минь, цератне, технологичнойть – вечктяно строямс предприятият, заводт, кить, тейтяно весементь шкастонзо. Ансяк бути весемес тень эйс а путомс ойме, тенесэ а карми эрямо. Те ежонть максстадо ансяк тынь, вечкевикс тейтерь-ават».
Мордовиянь Прявтось тешкстынзе сеть аватнень, кить топавтсть ине тевть Ине Отечественной войнанть шкасто – путсть важодемань рекордт, те стака шкастонть кассть ды стявтсть пильге лангс эйкакштнень. Башка мель сон явсь Мордовиянь аватненень, сеть боецтнэнь трицятненень-кастыцятненень, кить ней ванстыть сэтьме эрямонть минек масторсонть: «Вана кие алкукс путызе весе вечкеманть, весе виенть эсь эйкакштнес. Покш мелень явома ды сюконямо сеттненень, кие печти емавксонь сэредьксэнть. Миненек эряви улемс вейсэ Россиянть туртов неть аволь шожда иетнестэ».
Артём Здунов арсесь Мордовиянь тейтерь-аватненень тундонь мизолдомат ды парос кемема! Раськеютконь кенярксчинть каршо покш наградат явшезь минек республикань тейтерь-аватненень. Сынст ютксо – воспитатель, предприятиянь технолог, Россиянь Почтань важодиця, балетэнь артистка, кондитер, журналист, троллейбусонь ветиця, инженер, доброволец, врач, правань ванстомань органтнэнь важодиця ды волонтёр. Вейсэнди сынст вейке – весе сынь лиятнень енов а молицят, пек вадря тейтерь-ават!
Мордовия Республикань Прявтонь пресс-службась