Ледстясынек, Мордовиянть туртов Херсонской областень Каланчакской округось – подшефной территория. Республикась весемеендо лезды Каланчаконтень, истя жо социальной эрявикс объекттнэнь ды инженерэнь инфраструктурань вельмевтемасо. Мелят вельмевтезь иневанькс лисьмапрясь ды те таркасонть стявтозь Фёдор Ушаков адмиралонь лемсэ часовня. Тонавтнемань од иень ушодовомантень Каланчаконь енксонь школатнес пачтязь школань учебникть, художественной литература, спортонь оборудования, инвентарь ды ламо мезе лия. Минек врачтнень бригадатне свалшкань лувсо ардтнить подшефной енксонтень операциятнень, диспансеризациянь ды вакцинациянь ютавтоманть туртов. Каланчаксто эйкакштне уш аволь весть оймсесть «Лесная сказка» Саранскоень санаториясонть.
«Эйкакштнень оймсемаст коряс весе мельспаросот?» – кевкстинзе Артём Здунов делегациянь представительтнень.
«Эйкакштне ды тетятне-аватне мельспаросот!» – мерсть сынь.
Каланчаконь ВГА-нь прявтонь полавтыцясь Галина Мирошниченко округонь весе эрицятнень пельде евтась сюкпря республикань Прявтонтень лезксэнть кисэ. Сон тешкстызе: Мордовиясь – сехте вадря шефтнень ютксо вейкесь. «Тынк лезксэнк вельде Каланчаксо вельмесь эрямось, – мерсь сон. – Ломантне уш тонадсть эсь шефтненень, евтыть сюкпря лезксэнть кисэ, истя жо медицинань коряс. Каланчаконь эрицятне бажить понгомс самай Мордовиянь врачтненень».
Седе товгак – карматано молеме вейсэ. Кемекстазь инженерэнь инфраструктурань ды социальной эрявикс объекттнэнь, истя жо культурань объекттнэнь, витнемань коряс седе тов важодемань аравтлувось. Минек артистнэ ды шкинемань коллективтне уш ардтнесть Каланчаков концерт ды путовкс марто. Те важодемась ули поладозь. Мордовиясь истя жо карми явомо методической лезкс Каланчаконь енксонь культурно-досуговой учреждениятненень, библиотекатненень,одс теевиця эйкакшонь искусствань школатненень ды музейтненень, истя жо Россиянь Федерациянь грантонь покш пелькстамотнесэ улеманть туртов.
Мордовия Республикасо улемстэ инжетне молить культурань объекттнэс, теевить содавиксэкс эрзянь-мокшонь раськень койтнень-кирдатнень марто, муить ве мельсэ аштицят ды алкуксонь ялгат. Кода тешкстызе Артём Здунов, Мордовиясь панжадо седе тов вейсэнь тевдееманть ды вейсэнь шкинемань проекттнэнь топавтоманть туртов.
Мордовия Республикань Прявтонь пресс-службась