Импортонь полавтомань коряс «Выбирай своё» проектэсь нолдазь тевс 2022 иень эйзюрковсто. Сон аравтозь лездамс Россиянь предпринимательтненень ды производительтненень. Проектэнтень совавтозь 20 енкст, вейкесь юткстост – текстилень промышленностень предприятиятне. Сундерьковонь прядовомсто Саранскойсэ васенцеде ютавтовсь «Выбирай своё» отечественной производительтнень модань невтемась. Мордовиянь прявтошонь микшнемань покш куншкакуросонть республикань 13 брендтнэ ды дизайнертнэ невтизь эсест лия енов а молиця важодевксэст.
Вастовоманть панжомсто, Артём Здунов тешкстызе, модань невтемась кармась вадря лувокс республикань оршамопелень производительтнень шаштомаст туртов. «Лездамонь тевтне, конатнень минь явтано отраслянтень, монь койсэ, а сатыть, секс мекс тевтне течи пек полавтовсть. Ламот юткстонк лиссть од рынкатнес, лездыть минек боецтнэнень. Минь ламо статано военнослужащейтнень туртов. Ансяк эряви виевгавтомс минек важодеманть, штобу лездамс тенк касомс-кепетемс», – пшкадсь предпринимательтненень Артём Здунов.
Мордовиянь экономикань, микшнемань ды предпринимательствань министрань тевтнень топавтыцясь Иван Горин евтнесь бизнесэнть туртов государственной лезксэнь тевтнеде, конатнень яви МР-нь Предпринимательствантень лездамонь фондось («Мой бизнес» куншкакурось).
Раськеютконь рынкасонть кастомань-кепетемань возможносттнень коряс евтнесь республикань промышленностень, наукань ды од технологиятнень министрась Игорь Губайдуллин. Вадря невтемакс евтызе «Спрутс» предприятиянть, сонзэ спортонь коллекциясь истя жо ульнесь «Выбирай своё» невтемасонть.
Ламот бизнесментнэ пшкадсть кевкстема марто. Истя, башка предпринимателесь Анастасия Скворцова кевкстнесь театратнень ды культурань кудотнень туртов сценань оршамопельтнень стамонть коряс заказтнэс понгомадонть. МР-нь культурань, раськень политикань ды архивень тевень министрась Светлана Баулина тешкстызе истямо возможность максы «Культура малой Родины» партиянь проектэсь. «Местный дом культуры» енксонть коряс райононь ДК-нень мереви рамамс сценань костюмт башка предпринимательтнень кедьстэ.
Кортамось истя жо мольсь стамонь производствань сотрудниктнень профессиональной анокстамодост, нупальтнень сиведемстэ льготатнеде, маркетплейстнэсэ ды онлайн-лавкатнесэ важодеманть марто сюлмавозь ютавкстнэнь субсидированиядо. Весе кевкстематнень, конатнень евтызь предпринимательтне, республикань руководителесь кармавтсь саемс башка ванновт алов. «Седе сеедьстэ вастневеде, содадо, мезе эряви сеттненень, кить виевгавтыть отраслянть!»
Вастовоманть прядовомга явшевсть казнеть. «Единая Россия» партиянь Мордовиянь региононь отделениянь Благодарственной грамотатнесэ казезь республикань брендтнэнь ды дизайнертнэнь модань васенце невтемань анокстыцятне ды участниктне. Вастовоманть прядовомга участниктне вемельсэ тешкстызь: «Эзинек учо, минек стакачитнень карми ванномо Мордовиянь Прявтось, те пек питней ды максы вийть икелев шаштоманть туртов».