Республиканть туртов фигурной кирякстнемась – спортонь прявт вид. Регионсонть важоди спортонь школа, тов яксить малав 250 фигуристт. Республикасонть вадря спортонь инфраструктура – Мордовиясо улить 12 эень аренат, нилетне – Саранскойсэ. Тесэ ютавтовить весероссиянь уровнянь пелькстамот, конатнес коень коряс яксить ламо ваныцят.
Даволковонь 6-8-це читнестэ Мордовиянь прявтошсо «Огарев Аренасо» ютавтови Фигурной кирякстнемань коряс юниортнэнь ютксо Россиянь Первенствась.
Александр Коган евтась сюкпря республикань Прявтонтень спортонь те видэнтень покш мелень явоманть кисэ. «Минь арасельнек Саранскойсэ кавто иеть, кода нейтяно ней, ламось полавтовсь: инфраструктурась касы-кепети, ошось касы. Фигурной кирякстнемасонть лисить од спортсмент. Тынк эень од аренась пек вадря – кеман, весемесь лади сехте покш вешематненень», – мерсь сон.
Елена Чайковская мерсь: «Саранскоев спортсментнэ ды тренертнэ свал сакшныть покш мель марто. Тесэ башка лув, улемс тесэ пек мельспаро».
Мордовиянь Прявтось евтась сюкпря Федерациянь руководствантень кемеманть кисэ ды мерсь: лезэнь кандыця вейсэнь тевдеемась поладови. 2024 иень эйзюрковонь 1-4-це читнестэ Саранскойсэ ютавтовить «Кубок Дружбы» раськеютконь пелькстамотне, эйзюрковонь 8-11-це читнестэ – Конька лангсо синхронной кирякстнемань коряс Россиянь чемпионатось ды первенствась.
Вастовомасонть ульнесть республикань Правительствань Председателень васенце полавтыцясь Галина Лотванова ды МР-нь спортонь министрань тевтнень топавтыцясь Ольга Игошева.
Мордовия Республикань Прявтонь пресс-службась