Кода невтизе виде эфирэсь, неень шкане республикань эрицятнень весемеде пек талновтыть китнень, ЖКХ-нь, истя жо вадрялгавтомань-мазылгавтомань коряс кевкстематне. Истя, ламо стакачить невтсь аволь умонь эень пиземесь. Мордовиянь Прявтось толковизе, меельце иетнестэ од техника ошсонть эзь рамсеве, секскак сон ней а саты. Саранскоенть ванськавтомс ней мереви ливтемс техникань 112 единицат. Ошонь куротнень-китнень шкастост ванськавтоманть туртов эрявить малав 200 машинат.
«Тедеде минь ушодынек коммунальной техникань одкстомтомо – ошось уш рамась 8 единицат. Маласо шкасто муниципалитеттнэнень, истя жо Саранскоентень, максовить ключт коммунальной од машинатнень пельде. Теде башка, минь ней велявтано техниканть, конась аволь закононь коряс ливтезель ошонь хозяйствастонть», – мерсь республикань руководителесь.
Техникань асатомадонть башка, эште вейке тувталось – ванськавтомань коряс важодематнень ладямось. Весе районтнэнь руководительтненень ды ошонь мэрэнтень кармавтозь анокстамс ванськавтомань графикть: райононь эрьва руководителесь, мэрэсь, коммунальщиктне ды эрицятне содаст, кона шкастонть, ков ды кодамо погоданть пингстэ лиси техникась. Истя жо ули кадратнень а сатомань кевкстема. Муниципальной предприятиятнесэ вакансият улить – тешкстызе Артём Здунов. Текень пингстэ зарплатаськак ней вадря.
Тедеде регионсонть транспортонь инфраструктуранть виевгавтомс явозь покш ярмакт – 9,5 млрд ламо целковойть. 2022 иестэ витнезь региононь, межмуниципальной ды местной смустень 310 вайгельбеде ламо кить. Те важодемась ули поладозь, истя жо республикань енкстнэсэ.
Кевкстемась, конась эзь витеве кементь иеть, – жилищно-коммунальной хозяйствась. Сехте пшти стакачитне – Мордовиянь прявтошсо кельме ведень пачтямонь ды водоотведениянь сеттне ды Рузаевкасо канализациянь сеттне. Мордовиянь Прявтось ушодсь чугункань кинь важодицятнень ошонть коряс. «Тосо лиссь покш зыян, зярдо эсь шкастонзо горводоканалось максозель частной кедьтнес, эряви тешкстамс, аволь вадрят. Те ульнесь преступной схема, конань коряс ней важодить», – тешкстызе Артём Здунов. Ведень пачтямонь систематнень одкстомань коряс покш важодема ютавтови Саранскойсэ. Сундерьковонь прядовомсто тешкстазь вейсладямо ВЭБ.РФ ды Росводоканалонть марто Мордовиясо коммунальной инфраструктурань одкстомань проекттнэнь коряс вейсэнь важодемадонть. Те лезды явовтомс аволь бюджетэнь инвестицият покш важодематнень туртов ды уш кизна ушодомс ошонь ведень пачтямонь сеттнень одкстоманть. 49 иетнень перть ВЭБ.РФ путы 70 млрд ламо целковойть.
Ламо кевкстемат састь Саранскойсэ общественной транспортонть важодеманзо коряс. Республикань Прявтось видькстась, стакачись ули, ансяк сон витеви. «Курок ошов сы одкстомтозь техника. Минь сонзэ учотано. Те лезды вадрялгавтомс тевтнень», – мерсь Артём Здунов.
Ламот кевкстематне токшить башка куротнень ды эрямонь пункттнэнь – весе неть пшкадематне улить ваннозь.
Покш мель Мордовиянь Прявтось явсь мобилизованнойтнень семиятненень лездамонтень. Ладязь каршо сюлмонть вельде истят пшкадематне аламолгадсть. «Монсь якан истят семиятнес, зярдо эрсян районтнэсэ, ды муниципалитеттнэнь прявттнэ эрязасто вейсэндявсть те важодемантень», – мерсь Артём Здунов.
Республикань экономиканть виевгавтомадо кортамсто, региононь руководителесь макссь вадря питне те тевентень. Ней промышленностень ды АПК-нь предприятиятнесэ вадря зарплата марто малав вейксэ тежат вакансият. Важодиця специальносттнень коряс вадрясто пандыть, одкстомтови средней профессиональной образованиянь системась.
Региононь Прявтось макссь каршо вал кевкстеманть лангс, мекс республикань Правительствасонть появить ломанть лия регионтнэстэ. Истя, кортамось мольсь аволь умок ладязь од вице-премьерэнть Батыр Эмеевень коряс. «Эряви ваномс тевтнень коряс, – тешкстызе Артём Здунов. – Ульнесть руководительть, конат эрясть Мордовиясо ды саласть Мордовиясо. Кие ливтизе коммунальной техниканть ошстонть ды миизе сонзэ? Эсенектне. Секскак тевесь аволь сеньсэ, што ломантне сыть лия регионтнэстэ. Мон арсян, од вице-премьерэсь канды лезэ Мордовиянтень».
Виде линиянть шкасто Прявтось макссь каршо валт эрицятнень ламо кевкстемаст лангс, истя жо образованиянь, шумбрачинь ванстомань, спортонь, туризмань коряс. Сеттне, конатнень лангс апак максо каршо валт виде эфирсэнть, а кадовить ванновтомо. «Евтазь адрестнэнь коряс мон кармавтан ответственной лицятненень ардомс ды витемс стакачитнень», – тешкстызе Артём Здунов.
Мордовия Республикань Прявтонь пресс-службась