Промксонть панжомсто Мордовиянь Прявтось ледстизе, комиссиянь важодемась аравтозь национальной тевтнень топавтомантень, конатнень путынзе Россиянь Президентэсь Владимир Путин, прявтось юткстост - семиянь институтонтень лездамось ды социальной статусонть кастомась, семиянь прявт ёнкстнэ, демографиянь невтевкстнэнь вадрялгавтомась. Экспертэнь советсэнть ваннозь мельтне-арсематне истят ёнкстнэнь коряс, кода эрямо таркатнень доступностесь, семиянь инфраструктурань теемась, корпоративной стандарттнэнь тевс нолдамось, од, студентэнь ды ламо эйкакшонь семиятнень туртов демографиянь лезксэнь од ёнкстнэнь тевс нолдамось, вейкине пособиянь одкстомтомань, пенсиянь обеспечениянь ды семиянь налогонь пандомань кемекстамонь кевкстематне, эйкакш марто семиятнень туртов весе льготатнень ды пособиятнень получамонь вадрячись.
Комиссиянь прявтось тешкстызе: весе аравтлувтнень лезэвстэ топавтоманть туртов пек эрявикс те важодеманть профессиональной экспертэнь сопровождениясь. «Арсян, комиссиянь пурназь экспертэнь составось лезды топавтомс профессиональной компетенциятнень эрявикс уровнянть, кеме каршо сюлмонть», - тешкстызе Артём Здунов.
Комиссиянть лувсо пурназь важодемань сисем группат истят ёнкстнэнь коряс:
- обществасонть семиянь свалшкань питнейчитнень ванстоманть ды шаштоманть, семиянь ды мирдень-нинь институтонь кемекстамонть коряс (руководителесь - Семиянь, авань ды эйкакшпорань ванстомань кевкстематнень коряс Патриаршей комиссиянь председателесь Фёдор Лукьянов);
- ламо эйкакшонь трямонтень лездамонть ды чачтоматнень кастоманть коряс (руководителесь -Московонь Ламо эйкакшонь семиятнень вейсэндявксонь председателесь Наталья Карпович);
- важодиця тетятненень-аватненень лездамонть ды корпоративной семиянь политикань кастоманть-виевгавтоманть коряс (руководителесь - Менделеевень лемсэ Демографиянь политикань институтонь исполнительной прявтось Иван Ефимов);
- доступной ды семиянь туртов инфраструктурань тееманть, эрямонь условиятнень вадрялгавтомасо семиятненень лездамонть коряс (руководителесь - «Царьград» Институтонь попечительской советэнь председателесь Константин Малофеев);
- семиянть вадрячинзэ ды шумбрачинзэ, шумбра ярсамопелень лувтнень коряс (руководителесь - Государственной Думань Семиянь ванстомань, тетянь, авань ды эйкакшпорань кевкстематнень коряс комитетэнь председателень васенце полавтыцясь Татьяна Буцкая);
- эйкакшонь сэтьмечинь топавтомань, эйкакштнень ды од ломантнень ютксо деструктивной идеологиятнень а нолдамонь кевкстематнень коряс (руководителесь - Государственной Думань гражданской обществань виевгавтомань, общественной ды религиозной вейсэндявкстнэнь кевкстематнень коряс комитетэнь председателесь Яна Лантратова);
- репродуктивной шумбрачинь ванстоманть ды аборттнэнь профилактиканть коряс (руководителесь - Шумбрачинь ванстомань министерствань цёратнень репродуктивной шумбрачист коряс внештатной прявт специалистэсь, Лопаткин лемсэ урологиянь ды интервенционной радиологиянь НИИ-нь прявтось Олег Аполихин).
«Россиянь Федерациянь Президентэсь Владимир Владимирович Путин пек вадрясто тешкстынзе тенек демографиянь коряс вешематнень ды тевтнень, решениянь прявт смустенть. Неть тевтне вешить обществанть вейсэндявоманть, ресурстнэнь мобилизациянть ды сынст топавтомантень властень весе уровнятнень, весе регионтнэнь, муниципалитеттнэнь, бизнесэнть ды корпоративной секторонть, медицинань, педагогической, научной ды экспертэнь сообществань совавтоманть. Арсян, минек вейсэнь экспертной важодеманть вельде, Россиянь Федерациянь Президентэнь ды Правительствань Администрациясто коллегатнень, общественной, религиозной ды деловой вейсэндявкстнэнь марто лезэв вейсэнь важодеманть вельде минь топавтсынек минек Президентэнть кармавтоманзо ды демографиянь касомань кинть», - мерсь Артём Здунов.
«Институт научно-общественной экспертизы» АНО-нь генеральной прявтось Сергей Рыбальченко промкссонть невтизе демографиянь тевтнень коряс обзоронть, ёвтнесь тевтнеде, конат аравтозь ламо эйкакшонь семиятнень ламолгавтомантень.
Россиясо семиянтень, чачтоматненень ды ламо эйкакшонь аватненень-тетятненень лездамонь коряс мелензэ-арсеманзо ёвтынзе Стратегической инициативатнень агентствань семиянь ды демографиянь дивизиононь прявтось - «Социальные проекты» ёнксонь прявтонь полавтыцясь Григорий Сайфуллин.
Промкссонть эсест ванновтост истя жо невтизь РФ-нь Шумбрачинь ванстомань министерствань «Национальный медицинский исследовательский центр терапии и профилактической медицины» ФГБУ-нь прявтось Оксана Драпкина, «Высшая школа экономики» Национальной исследовательской университетэнь проректорось Лилия Овчарова, Россиянь Федерациянь Федеральной Собраниянь Государственной Думань Семиянь ванстомань, тетянь, авань ды эйкакшпорань кевкстематнень коряс комитетэнь председателень васенце полавтыцясь Татьяна Буцкая, Шумбрачинь ванстомань министерствань цёратнень репродуктивной шумбрачист коряс прявт аволь штатной специалистэсь, Лопаткин лемсэ урологиянь ды интервенционной радиологиянь НИИ-нь прявтось Олег Аполихин, «Подари солнечный свет» шкадо икеле чачозь эйкакштненень лездамонь благотворительной фондонь президентэсь Саниям Коваль, Федеральной медико-биологической агентствань руководителень полавтыцясь Николай Лишин ды лия авторитетной эксперттнэ.
Тешкстазель: эряви теемс истямо лув, косо ламо эйкакшонь триця семиятненень карми вадря. Масторонь эрицятнень ютксо ютавтозь кевкстнемась макссь кемевтиця цётавкст: 49% кевкстнезетне мерсть, ули мелест теемс ламо эйкакшонь семия, ды те невтевксэсь кассь меельце шкастонть. Кортамось истя жо мольсь эрямо таркатнень программатнень доступностенть, авань капиталонь лезэвчинь кастоманть, школасо андомань вадрялгавтоманть, од ломантнень репродуктивной шумбрачист, обществасонть питнейчитнень полавтоманть коряс – весе кирдизь прявт меленть: ламо эйкакшонь семиянть улезэ социальной покш статусозо.
Артём Здунов кармавтсь важодемань группатненень - весе ёнкстнэнь коряс ютавтомс лездамонь тевтнень ваннома, путомс питне целевой группатнень коряс сынст лезэвчинтень: «Тешкстасынек, мезесь важоди, мезесь веши полавтомат». Истя жо кемекстазь виевгавтомс кулянь максомань важодеманть: тердемс медиаплощадкат, содавикс ломанть Россиянь семиянь питнейчитнень невтеманть ды шаштоманть туртов.
Мордовия Республикань Прявтонь Пресс-службась