Башка мель явозель паломатнеде вирьтнень ванстомань кевкстематненень. Республикасонть ютавтовить мероприятият вирьтнесэ паломатнень а нолдамонь мониторингенть коряс, истя жо видеомониторингесь ды космической мониторингесь. Кортасть региононтень самоходной техникань, пилоттомо ливтнемань аппараттнэнь, видеокамератнень явомадо кевкстематнеде.
Кортамось истя жо мольсь вирень фондонь модатнень статусонь полавтомань коряс вейсэнь тевдеемадонть сеть участкатнесэ, косо моли китнень строямось. Те токши Саранскойсэ Гожувской куростонть саезь Победань куронть видьс кинь строямонть. Мордовиянь Прявтось тешкстызе: неть кевкстематнень таргамось вети строямонь тевтнень питнейгадомантень, секскак китнень эряви строямс куроксто.
Вирень фондонь модатнень пелькстнэнь республикань азорксчис эряви ютавтомс Вирьало Тавласо, косо арсеви одкстомтомс пандонь-соксонь базанть. Кода тешкстызе Артём Здунов, те объектэнтень сась виев инвестор, проектэсь ули совавтозь республикань социально-экономической виевгавтомань программантень. Пандонь-соксонь базась ашти Саранскоенть маласо, сонзэ одкстомтомась лезды Мордовиянтень кастомс туристтнэнь туртов мельстуеманть.
Мордовия Республикань Прявтонь пресс-службась