Васенце чистэнть ютавтовсь Артём Здуновонь ды Китаень Народной Республикасонть Россиянь Федерациянь Чрезвычайной ды Полномочной Посолонть Игорь Моргуловонь вастовомась. Кортасть республиканть ды КНР-нь провинциятнень ды оштнень ютксо вейсэнь тевдеемадонть. Тешкстазель, Россиянь Президентэсь кармавтсь ламолгавтомс товарооборотонть минек мастортнэнь ютксо, ды Мордовиясь теи эсь путовксонзо вейсэнь цетавксонь саемантень.
КНР-сь – Мордовиянь деловой прявт партнертнэнь ютксо вейкесь. Республикань вейсэнь внешнеторговой оборотонь малав ветеце пельксэнть саи Китаенть марто микшнемась. Тедеде микшнемань покшолматне невтить вадря динамика – касомась кармась малав 40% ютазь иень теке шканть коряс, колмоце пельксэс кассть Китайсэ нолдазь продукциянь рамсематне, экспортось покшолгавтовсь ниледе седе ламос. Китаенть марто вейсэнь тевдеемань кеме сюлмот кирдить республикань промышленной прявт предприятиятне - фармацевтической флагманось «Биохимик», кабелень, оптиковолоконной, светотехнической продукциянь нолдыцятне.
Мордовиясь арси келейгавтомс КНР-нть марто вейсэнь тевдееманть аволь ансяк микшнемань -экономической енкссонть, инвестициянь вейсэнь арсематнень топавтомасо, истя жо гуманитарной енкссонть. Образованиянь енкссонть лезэвстэ виевгавтовить Мордовиянь государственной университетэнть Китаень коллегатнень марто вейсэнь проекттнэ. Тедеде Саранскойсэ вузонть юрсо панжозь Россиянь-Китаень ялгаксчинь обществань отделения, келейгавтови вейсэнь тевдеемась Китаень научной покш куншкакуротнень марто.
Эряза вейсэнь тевдеема Мордовиянть ды Китаень провинциятнень ютксо моли «Волга-Янцзы» лувсо.
Китайсэ улемстэ Мордовиянь делегациясь карми важодеме «Волга– Янцзы» лувсо регионъютконь вейсэнь тевдееманть коряс Советэнь промкссонть, тосо карми улеме Равчирень федеральной округсо Президентэнь Полномочной представителесь Игорь Комаров.
Мордовия Республиканть пельде официальной делегациянтень совасть – региононь Правительствань Председателень полавтыцятне Наталья Таркаева, Батыр Эмеев, Н.П. Огарев лемсэ МГУ-нь ректорось Дмитрий Глушко.
Мордовия Республикань Прявтонь пресс-службась