Мордовиянть инекужосонть невтизь партиянь региононь отделениянь секретаресь, Мордовия Республикань Прявтось Артём Здунов, партиянь реготделениянь секретарень полавтыцясь – исполнительной комитетэнь руководителесь Станислав Тиньгаев, «Единой Россиянь» Председателень Региононь общественной приемноень руководителесь Сергей Вдовин, Государственной Думань депутаттнэ Василий Пискарев, Юлия Оглоблина, РФ-нь сенаторось Петр Тултаев, Мордовия Республикань Прявтонь администрациянь руководителесь Булат Хайрутдинов, Мордовия Республикань Правительствань Председателень полавтыцясь Галина Лотванова.
Инекужонь пленарной промкстонть икеле «Единой Россиясь» кучсь вешкань гуманитарной конвой весе масторонть пельде од регионтнэс.
Мордовиясь пачтясь 2 тоннат гуманитарной лезкс. Те ярсамопельть, шлямонь-нардамонь кедъенкст, велькст-алкст, СВО-нь боецтнэнь туртов эйкакштнень сермаст. Республикась свалшкань лувсо кучны гуманитарной лезкс минек боецтнэнень ды од регионтнэс.
Инекужонь пленарной промкссонть кортамсто, «Единой Россиянь» Председателесь Дмитрий Медведев евтась сюкпрянь валт сеттненень, кить аволь умок совасть «Единой Россиянтень». Неть ломантненень, сонзэ валонзо коряс, максозь партиянь билетт масторонь од территориятнесэ, ды ней сынь важодить фронтонь условиятнесэ.
Сон ледстизе, «Единой Россиясь» саи сехте ламо таркат Государственной Думасонть. Сонзэ депутаттнэ кочкамотнесэ изнямодонть мейле пурнасть сехте покш фракцият региононь парламенттнэсэ, местной самоуправлениянь органтнэсэ.
«Единой Россиянь» партиянтень совицятне, активисттнэ важодить прявт таркатнесэ исполнительной властень структуратнесэ, сыненст явить покш мель общественной прявт институтнэсэ. Те, целанек, комсь иетнеде седе ламо шканть перть минек важодемань цетавксось. Сеть бажамотнень цетавксось, конатнень минь путынек ды карматано путомо минек масторонь Президентэнь курсонть эрямос совавтоманть туртов. Миненек эряви чарькодемс: ков седе ламо тейтяно, тов седе кеме карми миненек кемемась – тов седе покш минек ответственностесь весементь сень кисэ, мейсэ эри масторось», – тешкстызе «Единой России» Председателесь.
Лия партиятнень коряс, «Единой Россиянть» улить алкуксонь возможностензэ ды опытэзэ, те лезды алкукс топавтомс путозь тевтнень, мерсь партиянь Председателесь XXI инекужосонть. Сон тешкстызе, государственной властентень эряви теемс весементь: касовольть-кепетевельть масторонь весе отраслятне. Сон мерсь, сеть тевтнень топавтомга, конатнень путынзе Президентэсь, – «Единой Россиянь» прявт смустесь, Отечестванть икеле долгось. Государствань прявтонь кирдемась неявозо аволь ансяк минек покш профессионализмасонть ды путозь тевтнень видестэ чарькодемасонть. Самай тевтнесэ миненек эряви сонзэ невтемс. Прявтось, мезе миненек ней эряви теемс, – те вадрясто важодемс Россиянть лезэс, минек Изнямонть туртов. Улемс Тиринь масторонть марто, зярдо сон печти аволь шожда цидярдомат», – тешкстызе Дмитрий Медведев.
«Единой Россиясь» ве мельсэ кирдизе Владимир Путинэнь масторонь Президентэкс кандидатокс аравтоманть.
«Партиянь истямо авторитетэнть, сонензэ общественной кемеманть юрсо ашти патриотизмань лувось, ломантнень туртов сонзэ ламо иень важодемась. Минь вейсэ печтинек варчамотнень, вейсэ саинек изнявкст, вейсэ миненек эште ламо сави топавтомс Россиянть лезэс», – тешкстызе РФ-нь Президентэсь Владимир Путин, Инекужонь пленарной промкссонть кортамсто.
«Течи эрьванть лангсо ашти покш ответственность. Минек икеле, апак покшкавтне, – историянь тевть. Сынст покшолматне вешить весе вийтнень вейсэндявоманть. «Единой Россиянть» туртов ды минек енкссо аштицятнень туртов, конат невтить ламо раськень обществань питнейчитнень, весе регионтнэнь – те, васняяк, покш важодемантень анокчись, икелев молемантень анокчись. Россиянь весе эрицятнень марто ванстомс минек масторонь суверенитетэнть, олячинть, сэтьмечинть – весементь, мезесь питней тенек. Минек историянть, культуранть, питнейчитнень ды койтнень-кирдатнень, кемекстамс социальной енксонть, научно-технологической потенциалонть, Россиянь миллионт семиятнень паро эрямост. Нама, важодемс обществанть вейсэндявомас», – мерсь Владимир Путин.
Президентэсь башка тешкстызе – конкуренциясь, мельтнень-арсематнень ламочись, стакачитнеде панжадо ды виде кортамось – масторонь свалшкань касомань-кепетемань юр.
«Бути а ули те касомась-кепетемась, а ули кияк. Ансяк свал, мельтнень-арсематнень явовомсто, весе политической вийтне кирдест мельсэ: мезесь минек туртов сехте прявт. Те – Россиянь уцяскась, мельтне-ванновтне, минек эйкакштнень часияст, кемемаст, арсемаст, минек масторонть правазо улемс виевекс. Те невти, весементь мешицянть, мезесь минек яжи-яви, эряви ертомс ве енов», – мерсь государствань прявтось.
Россиясь а машты, кода башка мастортнэ, колбасанть лангс полавтомс эсь суверенитетэнть. Западонь элитась арсесь яжамс минек экономиканть, политической ды социальной системанть – сынст арсематне эзть важоде ды а кармить важодеме Россиянть коряс, мерсь Владимир Путин. «Минек обществась, властень невтизь виевчист. Минь иеде иес ютынек суверенитетэнтень. Россиясо эрицятне ульнесть ды кармить властень вейкине лисьмапрякс. Миненек эряви седе товгак одкстомтомс демократической институттнэнь. Прявт тевесь – властень весе уровнятнень лезэвчист кастомась».
Владимир Путин евтась кемема, «Единой Россиясь» седе товгак карми евтамо обществантень самай истямо вейсэндиця повестка, редямо масторонь эрямонь сехте эрявикс кевкстематнень. Сон явсь мель, ламот законтнэ, конатне аравтозь специальной военной операциянь участниктненень ды сынст семиятненень лездамонтень, анокстазь «Единой Россиянть» ушодксонзо коряс. Сынст кисэ максызь вайгелест Госдумань весе фракциятне. «Евтан тенст сюкпря тень кисэ. Се, мезе моли парламентсэнть, – те ламосо Госдумасо «Единой Россиянь» важодемань цетавксось. Эряви седе товгак кирдемс вейсэнь тевдеемань сюлмот лия политической партиятнень, общественной вейсэндявкстнэнь марто минек туртов прявт тевтнень топавтомга», – мерсь Владимир Путин.
«Минь максынек каршо валт весе тердематнень лангс, секс мекс аламо-аламо, эскельксэнь эскелькс молинек суверенитетэнь кемекстамонь кинть ланга, истя жо политической ды общественной енкстнэсэ, экономикасо, образованиясо ды культурасо, виевгавтынек Россиянь федерализманть, минек законодательстванть ды конституциянь кеме юронть, нежединек минек государствань ламо пингень опытэнть, питнейчитнень ды раськетнень коест-кирдаст, культураст, келест, религияст лангс. Шкась веши пельденек виевчи ды вейсэндявома».
Сы шкантень Россиянь виевгавтомань стратегиясь кочкави эрицятнень марто вейсэ, мерсь государствань прявтось «Единой Россиянь» XXI инекужосонть.
«Программась, конань марто « Единой Россиясь» мольсь 2021 иень парламентэнь кочкамотнес, лемдезель народноекс, ды секскак сонзэ топавтомась аравтозь масторонь миллионт эрицятнень лезэс», – ледстизе Владимир Путин. Президентэсь тешкстызе, те документэсь пештеви од мельтнесэ-арсематнесэ, проекттнэсэ, уш витезь кевкстематнень ды апак вите тевтнень мельсэ кирдезь. Народной программасонть уш тешкстазь Донецкой ды Луганской народной республикатнень, Запорожской ды Херсонской областтнень социально-экономической вельмевтемань прявт енкстнэ.
«Арсян, «Единой Россиясь» прими ероков участия Семиянь иень проектсэнть. Обществанть, ломантнень марто кортамсто евты од ушодкст, конат аравтозь авакс улемантень ды эйкакшпорантень лездамонтень, минек семиянь свалшкань питнейчитнень кемекстамонтень, превс путомань ды наставничествань системань виевгавтомантень. Весе те пек эрявикс кевкстемат Россиянь демографиянь виевгавтоманть туртов, минек эрицятнень ванстоманть туртов», – мерсь Россиянь Президентэсь.
Сон тешкстызе, ломантнень талновтыця кевкстематнень, пшкадематнень лангс каршо валонь максомсто, кочкамодо икеле программантень эряви совавтомс истят енкст, кода шумбрачинь ванстомань первичной звенань виевгавтомась, массовой спортонь инфраструктурань строямось ды одкстомтомась ды лият.
«Тешкстаса – неть ды лия тевтнень, сы шкантень арсематнень минь карматано кочкамо, нама, вейсэ. Россиянь эрицятнень марто вейсэ анокстасынек сы шкантень виевгавтомань стратегиянть. Карматано тееме тень, васняяк, ломантнень мелест-арсемаст, вешемаст лангс нежедезь», – яволявтсь Владимир Путин.
«Единая Россия» партиянь МРО-нь пресс-службась