Истят вастовоматне ютавтовить свалшкань лувсо, региононь Правительствась бизнесэнть марто вейсэ важодить прявт тевтнень топавтоманть лангсо, аволь ансяк производственнойтнень, истя жо социальнойтнень. Вейсэнь тевдеемань прявт ёнксось ней - корпоративной демографической стандартонь топавтомась. Артём Здунов ледстизе: ютазь недлястонть те кевкстемантень алтазель Государственной Советэнь «Семья» ёнксонть коряс Комиссиянь промксось. Мордовиясь регионтнэнь ютксо васенцекс совавтызе башка пельксэнть, конась алтазь корпоративной демографиянь политикань топавтомантень, МР-нь Правительстванть, Профсоюзтнэнь федерациянть ды важодемань таркатнень максыцятнень вейсэндявксонь региононь отделениянть ютксо колмо ёнксонь вейсладямонтень. Республикань Прявтось кармавтсь промышленниктненень ветямс те важодеманть домкасто, пштистэ ванномс эйкакш марто семиятнень мелест-ванновтост. «Ёвтан весенень поздоровт Ламо эйкакшонь триця семиянь чинть кувалма, - мерсь Артём Здунов. – Эряви весенень важодемс минек свалшкань питнейчитненень велявтоманть коряс».
Шкась канды башка тердемат, бизнесэсь тееви од вешематненень ладицякс, вешни продукциянь миемань туртов од рынкат. Республикань Прявтось тешкстызе: эряви кирдемс предприятиятнесэ зарплатань уровнять - меельце иетнестэ сон редявикстэ кассь.
Икелев молеманть туртов эряви нолдамс тевс виевгавтомань институттнэнь возможностнень ды келейгавтомс вейсэнь важодеманть тонавтнемань организациятнень марто, истя жо университетэнть. «Вадряль, эрьвась эйстэнк лемдевель университетэнть эсенсекс», - мерсь Артём Здунов.
Республикань предприятиятнень продукциянь конкурентоспособностень юрокс ашти сонзэ инновационностесь, НИОКРатнень производствас совавтомась. Улить бизнесэнь Мордовиянь госуниверситетэнть марто вейсэнь важодемань вадря невтевкст. Республикань Прявтось кармавтсь прявттнэнень покш мель явомс неть тевтненень ды улемс вузонь индустриальной партнерокс.
Артём Здунов ёвтась сюкпря региононь вейсэндявксонтень совицятненень республикань повесткантень понгоманть кисэ, тешкстызе, властенть ды бизнесэнть ютксо вейсэнь тевдеемань истямо кемевикс лувось лезды вадрясто витемс куш-кодат тевтнень.
Промкссонть ульнесь РСПП-нь региононь виевгавтомань Управлениянь васенце вице-президентэсь - управляющей прявтось Сергей Мытенков. Сон тешкстызе важодемань таркатнень максыцятнень региононь вейсэндявксонь вадря важодеманть ды ёвтась сюкпря Мордовиянь Прявтонтень бизнес-сообществантень лездамонть кисэ. «Минь нейтяно, республикань бизнесэсь кеми тенк. Тынь сонзэ туртов - прявт ванстыця», - мерсь сон.
Промкссонть колмо иетнес «Союз промышленников и предпринимателей Республики Мордовия» важодемань таркатнень максыцятнень региононь вейсэндявксонь председателекс одс кочказь Виктор Бирюков. Сон ёвтась сюкпря организациянтень совицятненень кемеманть кисэ, ёвтась анокчи седе тов важодемантень ды кармавтсь коллегатненень эрязасто важодемс аволь ансяк эсь важодемань коллективтнень, истя жо эсь семиятнень демографиянь кевкстематнень коряс. «Эряви весенень арсемс, мезе кадтано эсенек мельга. Монь, невтемакс, ниле эйкакшон ды кото нуцькан», - мерсь сон.
Промкссонть кортасть важодемань таркатнень максыцятнень ды средней профессиональной образованиянь учреждениятнень вейсэнь важодемань кевкстематнеде - кортамось мольсь кадратнень анокстамонь лезэв системанть кемекстамодонзо, важодемань рынкань вешематнень ды региононь экономикань вадря виевгавтоманть мельсэ кирдезь. Кода тешкстызе МР-нь образованиянь министрась Елена Солдатова, седеяк ламо отличникть молить тонавтнеме СПО-нь учреждениятнес. «Те невти, предприятиятнес сыть превей ды эрявикс специалистт», – мерсь сон.
Теде башка, ваннозь вузонь виевгавтомань стратегиянть ды прявт стратегической проекттнэнь лувсо Н.П. Огарёв лемсэ МГУ-нть индустриальной партнертнэнь марто вейсэнь важодемань ёнкстнэ, истя жо эндаумент-фондонть тевс нолдазь вейсэнь тевдеемань ёнкстнэ.
Мордовия Республикань Прявтонь Пресс-службась