«Течи минь якинек «Рузхиммаш» заводонтень – мельспаро неемс, кода важоди республикань прявт предприятиясь. Кавто иеде икеле минь тосо ульнинек, ней неинек полавтомат продукциянь производственной линейкасонть, инвестициятнесэ, важодемань условиятнесэ, зарплатасонть. Башка кортавсть кадратнень анокстамонь кевкстематне – предприятиясь ваны вандынь чинтень, касы-кепети аволь ансяк финанстнэнь ды производстванть коряс, истя жо покш мель яви эсь важодицятненень. Те вадря невтевкс лия предприятиятнень ды регионтнэнь туртов. Нейтяно, Мордовиясь целанек касы-кепети вадрясто», – мерсь Игорь Комаров.
Республикань Прявтось тешкстынзе региононь экономикань касомань прявт невтевкстнэнь. Мордовиясо кирдеви ероков важодемань лувось – те неяви прявт капиталс инвестициятнень касоманть коряс (112%). «Мон арсян, тень лангс а лоткатано, секс мекс ероковсто важодтяно инвестортнэнь марто, – тешкстызе Артём Здунов. – Меельце кавто иетнень перть ламолгадсть вишка ды средней бизнесэнь субъекттнэ, те топавты налогтнень пандоманть».
Прявт невтевксэсь – республикань государственной долконь киртямось, ней те 93% бюджетэнь доходтнэнь покшолмантень, те пек покш киртямо колмо иеде икелень госдолконь покшолманть коряс, сестэ сон ульнесь 200% седе ламо. Тень вельде Мордовиясь меельце кемень иетнень перть васенцеде ютась государственной финанстнэнь берянь качествань управления марто регионтнэнь группастонть вадря управления марто группантень.
«Те республикань Прявтонть ды сонзэ команданть, весе региононть виев важодемазо, – тешкстызе Игорь Комаров. – Те лезды важодемс седе лезэвстэ, путомс седе ламо ярмакт ташто тевтнень витемантень, сы шкань касомантень-кепетемантень».
Республикасонть келейгавтозь «Рузаевка» икельдиця социально-экономической виевгавтомань территориясь, моли важодема экономикань башка зонань тееманть коряс. Пек вадря невтевкс марто прядозь велень хозяйствань иесь, пурназь 2 млн тоннатнеде седе ламо сюро – республиканть историясо васенцеде. Вейке гектарстонть саезь 44 центнерт – те сехте вадря невтевкс ПФО-со.
Мордовиянь Прявтось евтась сюкпря Игорь Комаровнень лездамонть кисэ ды тешкстызе, регионось бажи ванстомс касомань-кепетемань вадря лувонть. Прявт тевесь – улезэ баланс важодемань рынкасонть. 2024 иесь республикасонть яволявтозь Важодемань династиятнень иекс. Регионсонть арсеви ютавтомс ламо мероприятият, конат сюлмавозь семиянь ды важодемань питнейчитнень кирдеманть марто. «Мордовиясо ламо важодемань династият АПК-со, промышленностесэ, образованиясо, медицинасо. Сынь улест невтемакс лиятнень туртов», – мерсь Артём Здунов.
Игорь Комаров истя жо ютавтсь вастовома «Защитники Отечества» СВО-нь участниктненень лездамонь государственной фондонь филиалонь руководителенть Алексей Герасименко марто. Мордовиясо Госфондонь филиалонь важодемань шканть перть састь 7 тежадо седе ламо пшкадемат 4300 седе ламо ломантнеде пельде. Топавтозь 94% кевкстематне. Прявт пшкадематне – те боевой тевдеемань ветеранонь удостоверениянь получамось, соцподдержкань енкстнэнь кемекстамось, психологической лезксэнь явомась, ярмаконь пандоматне. 2023 иень сундерьковсто региононь Минздравонть лезксэнзэ пингстэ ютавтозь спецоперациянь ветерантнэнь диспансеризациясь, конась токшинзе 200 седе ламо ветерантнэнь. Фондось покш важодема вети эйкакштнень ды од ломантнень патриотизмань лувсо тонавтомань-превс путомань коряс. Республикань 60 седе ламо ветерантнэ ульнесть «Уроки мужества», «Разговоры о важном» вастовоматнесэ. Ютавтозь 150 седе ламо истят мероприятият – сынь токшесть 23 тежадо седе ламо эйкакшт ды од ломанть.
Мордовия Республикань Прявтонь пресс-службась