Келейгавтозь Саранскоень духовной семинариянь Попечителень советэсь

Келейгавтозь Саранскоень духовной семинариянь Попечителень советэсь

Маень 17-це чистэ Саранскойсэ ютавтовсь Саранскоень духовной семинариянь Попечителень советэнь промксось, сонзэ прявтсо Саранскоень ды Мордовиянь митрополитэсь Зиновий. Ваннозельть Мордовиясо духовной образованиянь виевгавтомасонть светской ды духовной властенть, истя жо бизнес-сообществанть вейсэнь важодемась. Промкссонть ульнесь Мордовия Республикань Прявтонь тевтнень нурька шкас топавтыцясь Владимир Волков.

Саранскоень ды Мордовиянь митрополитэсь Зиновий ёвтызе Саранскоень православиянь духовной училищанть, конась важоди Мордовиясо 1997 иестэ саезь, духовной семинариякс тееманть покш тешксэнь ды историянь алкуксонь тевекс, конась топавтовсь весень вийсэ.

Виктор Бирюков, Саранскоень духовной семинариянь Попечителень советэнь сопредседателесь, «Талина» агрохолдингень президентэсь, тешкстызе, Саранскоень ды Мордовиянь епархиянь храмтнэсэ служиця неень шкань священниктнень вадря полавксонть анокстамось течи канды покш смусть. Васенцесть, тувталокс тенень церьковань ламот служицятнень сырекадомась, омбоцесь, священниктнень образованияст кастомась.

Проектэнть топавтомась моли республикань предпринимателень вейсэндявксонть лезксэнзэ вельде. Ды те, кода тешкстызе Владимир Волков, бизнесэнь социальной ответственностень пек вадря невтевкс. «Обществань духовной кастомантень путомась – куватьс шкань инвестицият, конат аравтозь нравственной свалшкань питнейчитнень кемекстамонтень. Духовно-нравстенной лувтнэнь ванстомаст эйстэ ашти масторонть вандынь чизэ, сонзэ виевгавтомазо ды паро эрямозо», – тешкстызе Республикань Прявтонь тевтнень топавтыцясь.

Промкссонть истя жо ванкшновсть Попечителень советэнь важодемань кевкстематне, кемекстазь решения саемс советэнь од члент республикань бизнес-сообществань представительтнень ютксто.

Мордовия Республикань Прявтонть пресс-службась