«Кемлянский» спиртэнь заводось – Россиясо сехте кезэренсетнестэ вейкесь, сон важоди 1828 иестэнть саезь, сонзэ сюпав ды мельстуиця историязо, конась сюлмавозь историянь содавикс ломантнень марто, сынст ютксо Иван Грозный. Те заводонь азортнэнь марто ялгаксчинь сюлмот кирдсь Александр Пушкин. Те шкас ванстовсь 1828 иестэ строязь заводонь зданиясь, ды покш мель марто тей сакшныть экскурсиянь группат.
Ней Кемлянь спиртзаводось сови «МордовАлкоПром» холдингень компаниянтень.
Республикань Прявтось евтась сюкпря предприятиянь коллективентень койтнень-кирдатнень ванстоманть ды свалшкань касомантень-кепетемантень бажамонть кисэ. «Заводонь историясь а явови минек ине Россиянь историянть эйстэ, – мерсь Артём Здунов. – Тынь ванстадо таштонть ды тейтядо одонть – тенесэ изнявксонь юрось. Од енксось, конась ней тынк ули, эзь тееве чаво таркасо, те предприятиянть ды тынк специалисттнэнь покш важодемась. Республикась – тынк марто вейсэ!»
Кемлянь спиртзаводось Россиясо васенцетнень ютксо ушодызе дистилляттнэнь производстванть ды од енксонть – Россиянь односолодовой вискинь производстванть.
«Кемля» лемесь карми содавикс брендэкс», – тешкстызе Мордовиянь велень хозяйствань ды продовольствиянь министрась Антон Илюшкин.
Предприятиянь коллективентень поздоровт истя жо евтась Ицялонь енксонь прявтось Валентина Дмитриева. Сон евтась сюкпря «МордовАлкоПром» ООО-нь генеральной прявтонтень Евгений Сидоровнень муниципальной образованиянтень мелень явоманть ды свалшкань лезксэнть кисэ.
Велень хозяйствань ды перерабатывающей промышленностень чинть кувалма спиртзаводонь важодицятненень явшесть наградат.
«Карматано бажамо седе товгак славамо минек вечкевикс Мордовиянть», – мерсь холдингень руководителесь Евгений Сидоров.
Мордовия Республикань Прявтонь пресс-службась