Дмитриень тетязо-авазо - Александра Михайловна ды Анатолий Иванович эрить Кочкурова велесэ. Те иень сексня «Переселение граждан из аварийного жилищного фонда» программанть лувсо тенст макссть од квартира. Артём Здунов сась варштамо, кода од таркасонть эрить СВО-нь участникенть тетязо-авазо.
12 квартирань од кудосонть эрямо таркась валдо, покш – истямодо Александра ды Анатолий Барашкинтнэ эзть арсеяк. Эрямост перть сынь важодсть Мордовиясо, тесэ кастызь эйкакштнень. Мирдть-нить вейсэ 50 иеть, трудонь стажось кавтов – малав пинге. Эйкакштне кассть – цераст кочкизе военной службанть, тейтерест эри ды важоди тиринь Кочкуровасо тонавтыцякс. Барашкинтнэ – алкуксонь семиянь трудонь династиянь пек вадря невтевкс. Истят семиятнеде кортась Россиянь Президентэсь, сон яволявтызе те иенть Семиянь иекс.
Икеле кудосонть семиясь эрясь малав весе эрямост перть. Неть иетнень перть зданиясь, нама, пек каладсь. Од кудос ютавтомань федеральной программанть вельде пенсионертнэ вадрялгавтызь эрямонь условияст.
Республикань руководителесь кемевтсь: кудось лембе, ули весемесь вадря эрямонть туртов. Чаень симемстэ кортасть семиянь тевтнеде ды талновтыця кевкстематнеде. Артём Здунов кемевтсь: куш-кодат кевкстематнень бажатано витемс. Барашкинтнэнень вечкевсь мелень явомась.
Колмо иетнень перть Кочкуровань енкссо 1,5 тежат кавонзазь метрат каладозь эрямонь таркатнестэ од квартиратнес ютавтозь 68 ломанть. Од программантень улить совавтозь эште кавто ламо квартирань кудот, конатнесэ эрить 53 ломанть.
Мордовия Республикань Прявтонь пресс-службась