Артём Здунов васняяк ваннызе дошкольной учреждениянть – тесэ 11 группат, конатнес кельгстявить 240 эйкакшт, штатсонть важодить 27 ломанть. Малав 110 млн целковойтнень лангс, конат явозь нацпроектэнть лувсо ды путозь федеральной, республикань ды муниципальной бюджеттнэнь, истя жо «Октябрьская» Агрофирмань софинансированиянть лувсо, ютавтозь аволь ансяк строямонь-монтажонь тевтне, истя жо рамазь од оборудования кухнянть, музыкань ды спортонь залтнэнь, медблоконть туртов, мебель ды ламо мезе лия.
Эйдень кужонтень максозь эйдетнень СТЕМ-образованиянь технологиятнень коряс федеральной уровнянь инновациянь площадкань статус. Те од программа, конань коряс учреждениясь пештеви профориентациянь ютавтоманть ды эрьва кодат ерокчитнень виевгавтоманть туртов. Математикань ды логикань куншкакуросонть кармить ютавтовомо занятият естественной наукатнень коряс – залтнэсэ улить интерактивной лазт, эйкакшонь ноутбукт, микроскопт ды ламо мезе лия. Сенсорикань ды эмоционально-психологической разгрузкань куншкакуросонть ули весемесь оймсеманть туртов. Конструированиянь куншкакуросонть улить кубикть, эрьва кодамо стакачинь конструкторт, программированиянь туртов наборт. Эйдень кужонь каштанчись - мультипликационной студиясь.
Эйкакштне ды воспитательтне шкинемань коряс кармить важодеме театрализациянь ды музицированиянь куншкакуросонть, эйдень кужонь утренниктне кармить ютавтовомо профессиональной валдо ды звук марто алкуксонь сценанть лангсо. Эйдень группатне валдот, мазыйть – мазый тюстнэ сеске кепедить ежонть. Тей понгат теке евксос. Мордовиянь Прявтось пштистэ ваннызе весементь.
Артём Здунов истя жо ваннызе школанть, конась васенцеде витнезь 40 иетнень перть. 2008 иестэ учреждениянтень максозь Россиянь Президентэнь грант. Теде башка, уш кото иеть сови «Всероссийская школа почета» федеральной реестрантень. Школась кармась важодеме таштамковонь 1-це чистэ.
Покш Елховкань школань прявтось Александр Афроськин евтнесь, ней 20 класстнэсэ тонавтнить 450 эйкакшт. Таркат улить – учреждениянть проектэнь покшолмазо 650 ломанть. Эрьва чистэ школань автобустнэсэ тей усковить 20 эйкакшт васоло велетнестэ – Михайловкасто ды Вишка Елховкасто. Тесэ важодить 33 тонавтыцят, весемезэ школасонть 60 сотрудникть.
Уш а дивавтыть республикань педе-пев витнезь школатнень ушо енксост – весе сынь мазый тюсонь – эйкакштненень улевель мельспаро тонавтнемс. Покш Елховкань школаськак артозь истямо тюссо. Витнемань тевтнень топавтынзе секе жо подрядчикесь. Малав 90 млн целковойтнень лангс, конат явозь нацпроектэнть коряс, топавтозь строямонь-монтажонь тевть, одкстомтозь оборудованиясь, вадрялгавтозь школанть перька таркась. Залтнэсэ ды нупальтнесэ – неень шкань оборудования, лия енов а молиця лабораторият биологиянь, экологиянь ды химиянь класстнэсэ. Школасонть нолдави тевс математикань тонавтнемань профилень программась – 60% тонавтницятне кочкить профилень математиканть ЕГЭ-сэ, пурныть вадря баллт. Школась важоди Ероков эйкакштнень туртов лицеенть марто.
Школань библиотекасонть Мордовиянь Прявтось ваннызе медиацентрань важодеманть. Эйкакштне тейсть документальной фильма героической земляктнеде-СВО-нь участниктнеде. Фильмась невтезь «Артек» раськеютконь пелькстамосонть.
Артём Здунов кортась Васенцетнень движениянтень совицятнень марто.
Касомань точкасонть ды проектэнь тевдеемань классонть Мордовиянь Прявтонтень невтизь возможносттнень, конатнень школась анок максомс эсь тонавтницятненень эрьва кодамо енкстнэнь коряс ерокчитнень виевгавтоманть туртов.
Школань тонавтыцятне евтасть сюкпря региононь руководителентень Покш Елховкань эрицятнень туртов прявт социальной объекттнэнень мелень явоманть кисэ. Артём Здунов арсесь школантень изнявкст.
Мордовия Республикань Прявтонь пресс-службась