Середасто, маень 16-це чистэ, Саранскоев важодемань содавтома марто сакшнось Россиянь Федерациянь Правительствань Председателень Полавтыцянть тевтнень топавтыцясь Ольга Голодец. Мордовия Республикань Прявтонть Владимир Волков марто вице-премьерэнь тевтнень топавтыцясь ваннызь социальной зярыя объекттнэнь, конат сюлмавозь Футболонь коряс масторлангонь чемпионатонь матчтнень Саранскойсэ ютавтоманть марто, истя жо ульнесь «Мордовия Арена» стадионсонть варчамонь колмоце матчсонть.
Ливтямодо мейле Ольга Голодец ваннызе аэропортонь комплексэнть, конась панжовсь покш витнемадонть мейле. Ледстясынек, аэропортонь одкстомтоманть лувсо строязь кавто терминалт – эсенек ды омбо масторонь коштонь линиятнень туртов, ютавтозь важодемат ливтямонь-озамонь полосатнень витнемаст, рулямонь од китнень, коштонь движениянь управлениянь объекттнэнь строямонь, самолётонь аштема таркатнень ламолгавтомань коряс перрононь келейгавтома коряс. Ней Саранскоень аэропортонтень мереви вастомс ламо видэнь самолёттнэнь. Ванноманть шкасто Россиянь Правительствань вице-премьерэнь тевтнень топавтыцясь тешкстызе республиканть седе тов виевгавтоманть туртов неень шкань од аэропортонть эрявиксчинзэ.
Ольга Голодец ваннызе тренировкань площадкатнестэ вейкенть, конась строязь Футболонь коряс масторлангонь чемпионатонтень, сон ашти «Старт» стадионсонть, истя жо теевсь содавиксэкс Спортонь ведень видэнь дворецэнть важодеманзо марто. Объектэсь целанек лади укшномань коряс весероссиянь ды раськеютконь пелькстамотнень ютавтомань вешематненень. Ольга Голодец явсь мель сень лангс, Спортонь ведень видэнь дворецэнть строямонть пингстэ тевс нолдазь неень шкань ды покш технологиянь весе материалтнэ.
Теде мейле вице-премьерэнь тевтнень топавтыцясь якась Мордовия республикань клинической больницянтень, конась Саранскойсэ мундиаленть шкасто карми FIFAнь уполномоченной больницякс. Тешкстазель, Футболонь коряс масторлангонь чемпионатонть ютавтома шкантень «Мордовия-Арена» стадиононть юрсо панжозь Республикань клинической больницянь отделения спортонь пелькстамонь участниктненень ды фмероприятиянь ваныцятненень медицинань лезксэнть явомга, истя жо стадиононь ды болельщикень фестивалень мобильной бригадат.
РФ-нь Правительствань Председателень Полавтыцянть тевтнень топавтыцясь истя жо ульнесь Панамань футболонь коряс сборной командань тренировкань базасонть, конась мундиалень читнестэ карми Саранскойсэ Олимпийской резервань спортонь школанть территориясо. Ваннозельть тренировкань площадкатне, Панамань сборноень члентнэнь эрямонь туртов номертнэ, футболонь вельтязь манежесь.
Теке жо чистэнть Ольга Голодец макссь питне Four Points by Sheraton вете тештень гостиницантень, конась стявтозь Саранскойсэ Чемпионатонтень ФИФАнь клиентэнь группатнень туртов, ваннынзе С.Д. Эрьзянь лемсэ Мордовия республикань изобразительной искусствань музеень выставкань экспозициянть, истя жо Тёжа иень площаденть.
Варчамонь матчонть ушодовомадонзо икеле Ольга Голодец теевсь содавиксэкс «Мордовия Арена» стадиононь инфраструктуранть марто, ютавтсь промкс Футболонь коряс масторлангонь чемпионатонь матчтнень ютавтомантень республиканть анокстамонь коряс, конань прядовомга тешкстызе Чемпионатонть ушодовомантень республикань пек виев анокстамонть. Шумбракстнесь инжетнень марто, конасть састь стадионс «Мордовия (Саранск) ды Сызрань-2003» (Самарань область) профессиональной футболонь Лигань клубонь командатнень ютксо футболонь коряс Россиянь ФОНБЕТ Первенствань футболонь матчонтень.
Мордовия Республикань Прявтонть пресс-службась