Июнень 16-це чистэ "Мордовия Арена" стадионось примизе Футболонь коряс масторлангонь чемпионатонь васенце матчонть, сон ютавтовсь Перунь ды Даниянь сборнойтнень ютксо. Налксемадонть икеле Саранскоенть вельтизе спортонь алкуксонь фестивалень коволось.
"Welcome,Чемпионат 2018" кенярксчинь молемасонть куншкакуронь ульцятнева ютасть малав 5 тёжат ломанть. Сынст ютксо ульнесть раськень оршамопельсэ шкинемань коллективтне, музыкантнэ, барабансо налксицятне, од футболисттнэ. Мельгаст кандовсть сеске 32 командатнень флагост, кить примить участия Футболонь коряс масторлангонь чемпионатсонть. Зярдо жо молемантень вейсэндявсть Перунь сборноень ламот тёжат ваныцятне, сон теевсь эрзянь-мокшонь моротнень ды латиноамерикань киштематнень марто алкуксонь карнавалокс.
Тёжа иень площадьсэнть молемантень вейсэндявсь Мордовиянь Прявтось Владимир Волков. Кортамо вечкиця перуанецтнэ мольсть республикань руководителенть малас. Вейкесь эйстэст, зярдо кармась содамо, сон тейсь фотография "регионсонть прявт ломаненть марто", казсь Владимир Волковнень эсензэ Тиринь ёнксонь раськень тешкс марто футболка. Мордовиянь Прявтось максынзе уцяскавонтень эсензэ часонзо.
19 частнэс, матчонь ушодовомантень, "Мордовия Арена" стадиононтень пурнавсть 40 тёжадо ламо ломанть. Весемезэ, организатортнэнь ловомаст коряс, тесэ саезельть 40 тёжат 502 таркат. Налксемась прядовсь 0:1 счётонть марто Даниянь лезэс. Перунь сборноесь эзизе топавто пенальтинть, ды голонь зярыя чавоматнень, апак вано кементь тёжат болельщиктнень кирдемаст лангс.
Фототне "Известия Мордовии" газетастонть