Россиянь Строительствань ды жилищно-коммунальной хозяйствань министерствась ёвтынзе Градостроительной III конкурсонь итогтнень. Саранскойсэ ёроков эйкакштнень туртов республикань лицеень проектэсь ёвтазь изницякс кода образованиянь сферасо сехте вадря проектт.
Ледстясынек, объектэсь, конантень совить тонавтнемань ды спортонь корпуст, истя жо школанть пингстэ интернат, панжозь кавто иеде икеле. Оснащениянть ды строямонь технологиятнень коряс лицеенть мереви лемдемс европань уровнянь од строявксокс, конась вадрясто совавтовсь ошонь куншкакуронь строявкстнэнь юткс.
Строямось ветявсь Мордовиянь Прявтонть Владимир Волковонь ванновтонзо ало ды республикань бюджетэнь ярмактнень лангс. Республикань лидерэсь тешкстакшнызе, лицеесь карми прявт пельксэкс «школа – вуз – производства» кадрань анокстамонь структурасонть. Те тонавтомань од концепция марто лия ёнов а молиця общеобразовательной учреждения, конань прявт тевекс ашти покш технологиянь сферасонть сы шкань кадрань потенциалонь, покш классонь специалисттнэнь команданть пурнамось, конат маштыть ветямс икелев «превей» экономиканть. Неень шкане лицеесь саи омбоце тарка Россиянь «Топ-25» сехте вадря школатнень ютксо.
Конкурссонть изницятнень каземась ютавтовсь Россиянь инвестициянь строительной VI форумсонть. Дипломонть ды ледстнемань статуэтканть Россиянь Минстроень прявтонть Михаил Менень кедьстэ получизе Мордовия Республикань Правительствань Председателень Полавтыцясь – Строительствань ды архитектурань министрась Виктор Цыганов.