Февралень 8-це чистэ Саранскойсэ панжовсь «Кванториум» эйкакшонь технопаркось - те карми школасо тонавтницятненень научно-технической енкссо дополнительной образованиякс. Мордовия Республикань Прявтось Владимир Волков ванкшнызе технопарконть, кортась од исследовательтнень марто.
Ледстясынек, ютазь иестэнть Мордовиясь совась масторонь 17 регионтнэнь ютксс, конатнень явозельть ярмакт эйкакшонь технопарконть теемга. Федеральной бюджетстэ явозельть 56 млн целковойть ды республикань бюджетстэ - 24 млн целковойть. Неть ярмактнень лангс рамазь лия енов а молиця оборудования ды эйкакштнень туртов теезь алкуксонь лабораторият. Те лазерэнь технологият, биотехнологият, альтернативной энергетика, роботостроения ды, нама, компьютерной технологият - ков течи сынтемест? Оборудованиясь неень шкань весе вешематненень ладиця, сонензэ сявадыть промышленной башка предприятиятнеяк. Прявтось: Мордовиянь эйкакшонь технопаркось карми важодеме республиканть туртов эрявикс направлениятнень коряс. Эйкакшонь технопаркось панжозь «Технопарк - Мордовия» АУ-нть юрсо. Важодемась аравтозь прявт лувонтень: республикань промышленностень неень шкань отраслятнень туртов инженерэнь-технической кадратнень анокстамось.
Мордовиянь Прявтось Владимир Волков ванкшнынзе весе лабораториятнень, эли квантумтнэнь, кода сынст тесэ лемдить. Невтемга, «Энерджи» квантумсонть тонавтнемась аравтови альтернативной энергетикань прявт енкстнэнь тонавтнемантень ды сонзэ юрсо неень шкань транспортонь средстватнень теемань принциптне. Эйкакштне теевить содавиксэкс 3D-моделень проектированиянть марто, тонавтнесызь электротехникань, энергетикань, механикань прявт лувтнень.
Эйкакшонь технопарксонть весемезэ сисем лабораторият. Вейкесь эйстэст - лия енов а молиця: те «Лазерной технологият» лабораториясь. Истямо специализация арась масторонь эйкакшонь вейкеяк технопарксонть. Саранскойсэ те специализациясь теезь сень туртов, республикасонть виевгавтови волоконной оптикась ды оптоэлектроникась. Оптической волокнань нолдамонть коряс масторонь келес вейкине заводось важоди Мордовиясо, Саранскойсэ. Секскак Россиянь Минобразованиясь кирдизе республикань меленть оптикань ды лазерной технологиятнень коряс специализациянь тееманть.
«Истямо оборудованиясо мереви теемс алкуксонь панжовкст, - тешкстызе Республикань Прявтось Владимир Волков. - Минек эйкакшонь технопарконть мереви ловомс масторонь келес сехте оснащенноекс. Зданиянть стявтомс ярмакт эзинек ютавто, минь кельгстинек те площадканть «покш» технопарконть юрс. Секскак весе ярмактне, конат явозь те проектэнтень, ютавтозь неень шкань оборудованиянть рамамс».
Республикань Прявтось ёвтась поздоровт сеть тонавтницятненень, кить кармить невтеме научно-технической шкинемаст истят вадря условиятнесэ.
«Эйкакшонь технопарконть панжомсто дополнительной образованиянь системась лись качествань од уровняс, - тешкстызе Владимир Волков. - Истямо технопарксонть пурназь содамочитне лездыть эйкакштненень анокстамс сы шкань профессиянтень, муемс эсь тарканть эрямосонть».
Мордовиянь Прявтось тешкстызе, сы шкастонть республикань районтнэсэ панжовить эйкакшонь технопарконь филиалт, сонзэ специализациятне ламолгавтовить. Владимир Волков истя жо кармавтынзе промышленной предприятиятнень ды лабораториятнень прявттнэнь кирдемс важодемань сюлмот эйкакшонь технопарконть марто, ванкшномс тесэ сы шкань кадрат эсест производстватнень туртов.
Эйкакшонь технопарконть панжоманть лувсо казевсть школасо тонавтницятнень юткссо научно-технической шкинемань республикань конкурсонь изницятне. Республикань Прявтось казинзе од исследовательтнень ды кармавтынзе сынст бажамс од изнявкстнэс, виевгавтомс отечественной науканть.
Мордовия Республикань Прявтонть пресс-службась