2022 иестэнть саезь Мордовиянь Отяжбуень райононть ды Беларусь Республикань Червенской райононть ютксо ладязь ялгаксчинь сюлмот, кемекстазь вейсладямо научно-технической, образовательной, культурной, гуманитарной ды экономической енкстнэсэ. Эрязасто ветяви вейсэнь тевдеемась од ломантнень патриотизмань лувсо кастомань-тонавтомань коряс сехте вадря практикатнесэ полавтоманть коряс.
Мордовиянь делегациянть вастызе Червенской райононь райисполкомонь председателесь Валерий Новицкий, вастовоманть шкасто кортасть районтнэнь ютксо вейсэнь тевдеемань виевгавтомань коряс арсематнеде.
Червеньсэ Мордовиянь делегациясь путсь цецят ошонь прявт площадьсэнть Свалпалыця толонть ваксс, истя жо ульнесь Червенень райононь краеведениянь музейсэнть.
«Монь весе покштян воевасть, бабан истя жо воевасть, ансяк тылсэ – важодемань фронтсо, – мерсь Артём Здунов. – Дивавтыця ежось – ютасть зяро иеть, ды вана монень удалась понгомс сеть таркатнес, косо воевась монь покштянь лелязо. Тесэ сынь героически панизь ятонть, тень кисэ казезь государственной наградатнесэ. Ней минь сеть таркатнесэ – эрьванть туртов иневанькс таркатнесэ».
Мордовия Республикасо ламот чачозетне невтсть героизма Белоруссиянть фашисттнэнь эйстэ олякстомтоманть кисэ тюрематнесэ. 1944 иень медьковсто старшей сержантось Василий Федорович Здунов ульнесь 1-це Белорусской фронтонь 3-це армиянь 348-це стрелковой дивизиянь 207-це отдельной истребительно-противотанковой дивизиононь орудиянь командирэкс. Сон башка явовсь Минской операциянть шкасто. 1944 иень медьковонь 1-це чистэ сонзэ подразделениясь кирдсь позициятнень Сунище веленть маласо, конась ашти Могилев – Минск кинть вакссо. Эрявсь а нолдамс немецень войскатнень колоннанть, конат бажасть оргодемс окружениястонть. Советской боецтнэ аштесть куломазост. Здуновонь расчетось лединзе кавто штурмовой орудиятнень, ниле машинатнень, яжинзе военной ули-паро марто кавксо крандазтнэнь ды кементь яттнэнь. 47 минек военнослужащейтнень ютксто живстэ кадовкшность ансяк колмо, сынст ютксоль - Василий Федорович Здунов. Героизманть ды мужестванть кисэ сонензэ максозь Советской Союзонь Героень лемесь.
Мордовиянь Прявтось евтась сюкпря музеень важодицятненень историянь ледстнематнень ванстоманть кисэ, тейсь тень коряс сермадовкс почетонь инжетнень книгасонть.
Отяжбуень енксонь прявтось Константин Николаев казсь музеень прявтонтень Белоруссиянь эрицятнень летописень книга, конат Ине Отечественной войнань иетнестэ ускозельть эвакуацияс Мордовиянь АССР-нь Отяжбуень муниципальной райононтень.
Артём Здунов тешкстызе: «Арсян, неть ломантнень малавикстнэнень ули мельспаро самс миненек, сеть таркатнес, косо войнань ды войнадо мейлень иетнень ютавтызь сынст бабаст, покштяст. Монь пек токимем сеть ломантнеде евтнемась, кить содылизь монь покштянь».
Мордовия Республикань Прявтонь пресс-службась