Январень 19-це чистэ Мордовия Республикань Правительствань Председателесь Владимир Сушков ютавтсь промкс, косо ванкшновсть 2018 иень футболонь коряс мирэнь чемпионатонтень Саранскоень аэропортонь комплексэнть анокстамось.
Кортамосонть примасть участия: Воздушной транспортонь федеральной агенствань прявтонть полавтыцясь Константин Махов, «Администрация гражданских аэропортов (аэродромов)» ФГУП-нь генеральной директоронть тевтнень топавтыцясь Юрий Жирков, «Организованный комитет «Россия-2018» АНО-нь башка подразделениянть прявтось Денис Брагин, «Ирмаст-Холдинг» АО-нь подрядной организациянть прявтось Дмитрий Лебедев ды «ДАРС-Строительство» ООО-нь подрядной организациянть прявтось Сергей Седов, «Ленаэропроект» ОАО-нь прявт инженерэнь полавтыцясь Борис Фетисов, Мордовия Республикань Правительствань членттнэ, Саранск ошонь округонь Администрациянь важодицятне, ресурсонь пачтицянь лы лия организациятнень прявттнэ.
Республикань Прявтось Владимир Волков аволь весть явокшнось мель аэропортонь комплексэнь одкстомтомань проектэнть топавтомань талновтыця кевкстематненень, конат эряви витемс маласо шкастонть.
Промкссонть ванкшнозельть прявт кевкстематне, конат сюлмавозь Мирэнь чемпионатонь ютавтомань объекттнэнь анокстамонть марто, башка ванкшнозельть 2017 иес строямонь ды инженерэнь тевтне, максозь эрявикс кармавтомат.
Содазь, строямонть ушодовомсто листь стакачить графикенть эйстэ кадовоманть коряс, сынь сюлмавозь подрядчиктнень аволь алкуксонь важодеманть марто. Ней аэропортонь комплексэнть одкстоматоманть коряс важодить лия организацият - «Ирмаст-Холдинг» АО-сь ды «ДАРС - Строительство» ООО-сь. Полавтомась кандсь лезэ. Стакачитне кадовить, ансяк сынь а кандыть покш зыян.
Течи редявить строямонь тевтне, конат ютавтовить федеральной ды региональной пелькстнэнь коряс. Аравтлувонть эйстэ кадовомась сасави, объектсэнть теезь важодемань башка смена. Покшолгавтовить коштонь суднатнэнь аштемань таркатне, одкстомтомвить ливтямонь-озамонь полосатне, теевить аэропртонь комплексэнь свалшкань терминалтнэ ды лия важодемат.
Мордовия Республикань Правительствань Председателесь Владимир Сушков тешкстызе, прявтось - весе тевтнень топавтомс контрактонть коряс ды шкастонзо.
Реконструкциянть прядомадонзо мейле Саранскоень аэропортось ливтямотнень сэтьмечист ванстомаст коряс карми ладямо мирэнь неень шкань весе вешематненень ды тосо кармить примамо Boeing 737, Airbus ды коштонь лия суднат.
Мордовия Республикань Прявтонть пресс-службась