Мордовиянь Прявтонь тевтнень нурька шкас топавтыцясь Владимир Волков: "Эряви важодемс сень лангсо, Россиясо эрьва омбоце лампочкась улезэ теезь Саранскойсэ"

Овторникстэ, апрелень 18-це чистэ, Мордовиянь Прявтонь тевтнень нурька шкас топавтыцясь Владимир Волков примась участия торжественной промкссонть, конась алтазель Республикань светотехникань чинтень.

И.М.Яушев лемсэ Государственной музыкань театрань залонтень пурнавсть предприятиянь важодицятне, прявттнэ ды специалисттнэ, инженертнэ ды мастертнэ, учёнойтне, преподавательтне, светотехникань промышленностень малав весе ёнксонь представительтне.

"Течи башка кенярксчи. Сон тешкстави ансяк минек регионсо. Ламо иетнень перть светотехниканть марто сюлмавозь Мордовиянь кементь тёжат эрицятнень уцяскаст. Мон ёвтан тыненк, тынк лицясо весе коллегатненень, ветарнтнэнень поздоровт профессиянь кенярксчинть - Мордовия Республикань Светотехникань чинть коряс, - мерсь МР-нь Прявтонь тевтнень нурька шкас топавтыцясь. - Башка тешкстаса, Россиянь Президентэнть В.В.Путин марто вастовомасонть, конась ульнесь апрелень 12-це чистэ, башка мель явозель светотехникань промышленностень виевгавтомантень. Мон ёвтнинь Президентэнтень, минь вельмевтяно сеть отраслятнень, конат виевгавтовсть минек ёнкссо. Васняяк, те светотехникась.

Течи масторсонть эрьва колмоце лампочкась нолдави Саранскойсэ. Минь важодтяно сень лангсо, штобу лисемс эрьва омбоценть лангс. Президентэсь кирдинзе те ёнкссо минек меленек, ды арсесь важодемань коллективтненень лезэв важодема".

5 иеде икеле республикасонть теезь светотехникань отраслянь кластер. Неень шкане тов совасть 43 предприятият, ютксост приборостроительной ды оптоволоконной ёнксонь. Кластерэнь виевгавтомантень тердезь малав 5 млрд целковойть. Теезь кавто тёжадо ламо важодемань од таркат. Груздязь эсенек нолдавт инновациянь продукция 28 млрд ламо целковойс. Ютазь иестэ инновациянь продукциянь покшолматне кассть 23%.

"Башка тешкстаса, 5 иетнень перть отраслясонть важодемань лезэвчизэ кассь кавтос ды пельс! Ютазь иестэ те 1 миллион 200 тёжат целковойть вейке ломаненть лангс. Зярдо 2012 иестэ минек теинек светотехникань кластерэнть, те невтевксэсь ульнесь 450 тёжат целковойть вейке ломаненть лангс", - мерсь Владимир Волков.

"Мордовиянь Технопарконть" юрсо важоди Энергиянь ванстомань светотехникань куншкакуро, козо путозь неень шкань оборудования. Тедеде арсеви панжомс Волоконной оптикань Инжинирингень куншкакуронть. Республикась кирди кеме сюлмот фотоникань виевгавтомань коряс научной прявт центратнень марто.

Ютазь иень октябрясто "Светотехника и оптоэлектронное приборостроение" инновациянь кластерэсь кармась Россиянь Минэкономразвитиянь пелькстамонь изницятнестэ вейкекс. Течи те масторсонть светотехникань ды валдомтомань, волоконной оптикань ды оптоэлектроникань ёнкссо вейкине куншкакуро.

"Кластерэнь участниктнень икеле ашти прявт тев саемс эсенек масторонь светотехникань рынкань нилеце пельксэнть, истя жо редявикстэ покшолгавтомс продукциянь экспортонть, саемс миемань од рынкат, - тешкстызе Мордовиянь Прявтонь тевтнень нурька шкас топавтыцясь. - Тень туртов минек теезь весе условиятне. Масторсонть Мордовиясь ашти ваеснце таркасо промышленной производствань покшолматнесэ инновациянь продукциянь пельксэнть коряс (те 28%). Светотехникань предприятиятнесэ те невтевксэсь малав 50%! Течи минек предприятиятнесэ нолдави неень шкань светотехникань продукциянь малав весе ассортиментэсь. Те валдонь энергоэффективной источниктне ды сынст юрсо теезь валдомтомань прибортнэ, электронной компонентэнь базась ды валдомтомань управлениянь систематне. Истя, невтемга, "Лисмасо" нолдавить светодиодонь филаментэнь лампат, конась кеместэ саи од рынкат".

Меельце иетнестэ региононь руководствась путсь ламо вийть лия ёнов а молиця те предприятиянть вельмевтеманзо коряс. Заводсонть удалась лоткавтомс лондадомань тевтнень. Нолдавить од линият, пекстазь эрексиянь цехесь, теевить важодемань од таркат, ломантненень свалшкане пандови зарплата. Течи ""Лисмась" - Россиясо ды СНГ-нь мастортнэсэ валдонь источникень сехте покш нолдыця.

Предприятиянь продуктонь линиянтень совавтозь 300 ламо лемть. Продукциянь малав 15% пачтявить экспортов. Кемекставить сюлмотне Чехиянь, Венгриянь, Иранонь, СНГ-нь мастортнэнь партнёртнэнь марто. Ютазь иестэ "Лисмась" панжсь вейсэнь предприятия Бурундисэ.

"Минек тевенек - саемс африкань рынканть, лисемс транснациональной уровняс. Минь кемтяно, од компаниянть покшт перспективанзо", - мерсь В.Д.Волков.

Отраслянть виевгавтомасо покш эскелькс теезь "Кадошкинань электротехнической заводсонть" ды "Орданьбуень светотехникань заводсонть". Неть предприятиятне саить покш тарка эсест районтнэнь ды целанек республиканть виевгавтомасо.

Орданьбуень заводсонть нолдави кавто тёжадо ламо светильникень модификацият. Ней предприятиясонть путови од техника, анокстави валдомтомань прибортнэнь массовой нолдамось, иезэнзэ малав 5 млрд целковоень питнесэ.

Кадошкинань заводось ловои газоразрядной лампа марто светильниктнень теемань прявт нолдыцякс. Предприятиянь инновациянь пельксэсь кармась 40%, иезэнзэ покшолгавтовсь 68%. Производствань покшолматнень касомась 27% ламо.

"Валдомтомтомань уш содавикс прибортнэде башка виевгавтови валдонь башка источниктнень нолдамось. Мон кортынь Президентэнтень, "Непес" Южной Кореянь фирманть марто вейсэ республикасонть минь нолдатано светодиодт. Неень шкане предприятиясонть келейгавтови ве ёно аштиця люминофоронь технологиянть коряс светодиодонь светильниктнень ассортиментэсь. Футболонь коряс мирэнь чемпионатонтень анокстамонть лувсо сынь путовить Саранскоень, Нижней Новгородонь ды Волгоградонь стадионтнэс", - тешкстызе Республикань Прявтонь тевтнень нурька шкас топавтыцясь.

Лодыгинэнь лемсэ валдонь источникень научно-исследовательской институтось теи ультрафиолетэнь лампат, конат нолдавить тевс медицинасо, косметологиясо, велень хозяйствасо.

Ёроковсто важоди Электрической лампань ды светотехнической теевксэнь сертификациянь куншкакурось. "Хелиос Ресурс" заводсонть келейгавтови чипаень электростанциянь компонентнэнь нолдамось.

"Башка тешкстаса, Мордовиясо теезь светотехникань ёнкссо профессиональной кадратнень анокстамонь туртов вадря база. Тесэ, масторонь вейкине регионсонть, университетсэ ули светотехникань факультет. 2015 иестэ сон теезь Электроникань ды светотехникань Институтокс. Неень шкане сонзэ юрсо ютавтовить эрьва кодат исследованият. Проекттнэнь эйстэ вейкенть од учёнойтне топавтыть Испаниясто Фернандо Бриз профессоронть прявтсо, - тешкстызе Владимир Волков. - Сы шкань учёнойтнень ды од поколениянь учёнойтнень анокстамосо редявикс тарка саи Ёроков эйкакштнень туртов лицеесь. Аволь умок Саранскойсэ панжозь Эйкакшонь технопарк. Тов путозь истямо техника, конанть вельде эйкакштне кармить тееме алкуксонь исследованият. Башка тешкстаса, перспективанть улемга - эряви эрязасто шаштомс инновациянь виевгавтомасонть, вельмевтемс отраслянь научной потенциалонть, производствасо нолдамс тевс наукань панжовкстнэнь. Те ёнкссонтень эряви тердемс од ломанть, пандомс тенст вадря зарплата, витемс эрямо таркань стакачист. Тень туртов республикасонть течи улить весе возможностне".

Мордовиянь Прявтонь тевтнень нурька шкань топавтыцянть валонзо коряс, самай светотехниктне теизь республиканть кода "чипаень" региононь ды Саранскоенть - эсенек масторонь "валдонь прявтошонь" имиджень юронть.

Отраслянь сехте вадря важодицятненень явшевсть казнеть.

Сюкпрянь башка валт ёвтазь светотехникань ветерантнэнень. Владимир Волков явшесь тенст ледстнемань казнеть.

Профессиянь кенярксчинть кувалма отраслянь важодицятненень поздоровт ёвтась МР-нь Государственной Собраниянь Председателесь В.В.Чибиркин.

Залонтень пурнавозетненень казнекс кармась творчествань коллективтнень пельде концертэсь.