Недлячистэ, медьковонь 12-це чистэ, Мордовиянь Прявтось Владимир Волков ваннынзе Саранск ошонь округонь строямонь объекттнэнь. Сынст ютксо – китнеяк, конатнень лангс сеедьстэ пеняцить эрицятне.
Республикань Эйкакшонь клинической больницянь хирургиянь од корпусонь строямонь площадкасонть, апак вано оймсема чинть лангс, важодемась лаказь лакась. «Тевтне молить кемекстазь аравтлувонть коряс, неть темпатнень эряви ванстомс!» - тешкстызе Владимир Волков.
Ледстясынек, объектэнь строямось ушодозь «Здравоохранение» нацпроектэнть лувсо. Вейсэнь питнезэ – 2 млрд. целковойде ламо, пеледест ламо ярмактне явовить медицинань од оборудованиянть рамамс. Од корпуссонть стационаронь лувсо карми явовомо диагностикань, хирургиянь ды реанимациянь медицинань лезкс, истя жо ансяк чачозетненень. Республикань Эйкакшонь клинической больницянь хирургиянь од корпусонь строямонть арсеви прядомс 2021 иень ацамковсто.
А вана китнень витнемань коряс топавтовиця тевтне Мордовиянь Прявтонтень мельс эзть туе. Владимир Волков ардсь Фурмановонь ды Солнечной, истя жо 1-це Промышленной ды Мичуринэнь куротнева, неизе, тевтне аштить таркасост. Неть таркатнесэ витнемань тевтнень эрявсь ушодомс уш умок, ансяк кинь теицят неть куротнесэ семс арасть.
«Ламот неть объекттнэсэ умок уш эряви важодемс строицятненень! Эряви домкасто ванномс сеть тувталтнэнь, мекс ошонь администрациясь а витни китнень, конатнень лангс пеняцить эрицятне. Ды кемекстамс мерат», - тешкстызе республикань Прявтось.
Мордовия Республикань Прявтонть пресс-службась