Кода тешкстызе партиянь Председателесь Дмитрий Медведев, партиянь прявт документэсь анокстазь ломантнень мелест-арсемаст коряс, секскак кемекстазь, апак вано аволь шожда тевтнень лангс, аравтлувтнень а полавтомс.
Теде башка - раськень программантень совавтозельть колмо од ёнкст: «Поддержка участников СВО», «Развитие новых регионов» ды «Развитие туризма». «Весе тевтнень, конат тешкстазь раськень программасонть, партиясь полады топавтомо шкастонзо ды целанек. Сонзэ топавтомантень федеральной бюджетстэ явозь 17 триллиондо седе ламо целковойть ютазь колмо иетнень перть», - тешкстызе сон.
Дмитрий Медведевень валонзо коряс, те важодемань прявт невтевкстнэнь ютксо - образованиянь ды шумбрачинь ванстомань инфраструктуранть покш одкстомтомась. Теде башка ушодовсть эйдень кужотнень ды средней профессиональной образованиянь учреждениятнень, истя жо вузтнэнь общежитиятнень педе-пев витнемань од программатне.
Промкссонть кортась Мордовиянь Прявтось, партиянь Мордовиянь региононь отделениянь Секретаресь. Сон ёвтнесь социальной инфраструктурань одкстомтоманть лангс бюджетэнь ютавкстнэнь лезэвчист кастомань коряс региононь опытэнть коряс.
Раськень программань прявт ёнкстнэстэ вейкесь - школатнень одкстомтомась. Мордовиясь программань важодеманть перть педе-пев витнинзе пеледест ламо велень школатнень. 2025 иестэнть саезь республикась вейсэндявсь эйдень кужотнень ды техникумтнень педе-пев витнемань программантень. Объекттнэ максовить обязательстватнень апак кола, натой шкадо икеле. Весемесь - кеме администрированиянть, общественной контроленть, эсенек производительтнень материалтнэнь тевс нолдамонть, икельдязь контрактациянть вельде. «Неть лувтнень вельде, пек чарькодевикст ды шождат, минь валгстынек педе-пев витнемань вейке квадратной метранть питнензэ 28,5 тёжат целковойс. Программантень эрязасто совавтано важодема таркань максыцятненень, бизнес-партнертнэнень. Сынь истя жо кирдить вал эйкакштнень ды важодицятнень туртов вадря условиятнень кисэ, секскак иляст аште ве ёно», - мерсь Артём Здунов.
Педе пев витнемань коряс покш важодема арсеви маласо иетнестэяк.
Мордовиянь Прявтось истя жо ёвтась невтевкс школасо андоманть коряс. «Содан, башка регионтнэсэ ярмактне а сатыть. Мекс истя лисни? Секс мекс рамсить аволь видьстэ производительтнень кедьстэ. Минь теинек вейкине оператор пси ярсамопелень коряс, конась вадря качествань коряс рамси сехте вадря продукция местной производительтнень кедьстэ. Те лезды ванстомс ярмактнень, явомс вадря услуга», - мерсь Артём Здунов.
Мордовия Республикань Прявтонь Пресс-службась