НСФЛ-нь Высшей дивизиононь вейксэце сезонось ютавтовсь 2023 иень чадыковсто саезь сундерьковс – кото группатнесэ сехте виевтнень лементь кисэ бороцясь 51 команда Россиянь 29 регионтнэстэ. Турниртнэнь ютавтомань прявт таркакс кармась «Ессентуки Арена», матчтне истя жо ютавтовсть Саранскойсэ «Мордовия Аренасо» ды лия оштнесэ.
«Ламо иетнень ютазь минь велявтано профессиональной футболонтень, витевить финансонь ламо кевкстематне. Минек ули футболонь школа, ломанть, конат тенесэ эрить, – пшкадсь спортсментнэнень ды тренертнэнень Артём Здунов. – МГУ-нь командась сы иестэ карми налксеме Национальной студенческой футболонь лигань высшей дивизионсонть – те покш цетавкс. Весемесь покшось ушодови истят кузтематнестэ. Команданть ули сы шкантень бажамозо, вадря тренерэнзэ – весе те профессиональной футболонь виевгавтоманть туртов вадря ушодкс».
Изницятнень командантень поздоровт истя жо евтась Национальной студенческой футболонь лигань президентэсь Андрей Стукалов. «МГУ-нь ероков од командась редявикстэ совась студентэнь лигантень, невтсь футболонь покш уровня. Тешкстасынь ваныцятнень – перьканк пурнавить пек ламо студентт. Сы шкастонть арсян понгомс масторонь студентэнь сехте виев командатнень юткс», – мерсь сон.
Н. П. Огарёв лемсэ МГУ-нь ректорось Дмитрий Глушко тешкстызе: вузось ютавтсь командань покш важодема, конась кандсь цетавкст. «Од ломантне невтсть обуця спортсонть, текень пингстэ сынь поладыть тонавтнеме. Футболось лиссь пек мазый! Путтано тев – лисемс премьер-лигантень», – мерсь сон.
Церемониянть шкасто футболисттнэнень явшесть медальть ды дипломт, Мордовия Республикань Прявтонь благодарственной сермат. Весе спортсментнэнень истя жо максозь «Кандидат в мастера спорта» спортонь разрядось. Национальной студенческой футболонь лигань чемпионатонь кубоконть сонзэ председателесь максызе командань капитанонтень Ильдар Кадыровнень. Казнеть максозь тренертнэненьгак.
«Лучший тренер НСФЛ группы Б» лемесь максозь командань прявт тренерэнтень Михаил Аношкиннэнь. Дмитрий Глушко кармась сехте вадря ректорокс вузтнэнь Б группань командатнень ютксо.
Тешкстасынек, весе сезононть перть МГУ-нь студентэнь командась невтсь покш цетавкст аволь ансяк НСФЛ-нь чемпионатонь налксематнесэ, истя жо регионъютконь ды региононь уровнянь официальной турниртнэсэ, кармась Мордовия Республикань чемпионокс, МР-нь Кубоконь ды СуперКубоконь саицякс, истя жо «Кубок Регионов» Россиянь вечкиця командатнень ютксо пелькстамотнень сиянь призерокс. Командань форвардось Евгений Сафонов чавсь 15 голт, кармась НСФЛ-нь турнирэнь сехте вадря бомбардирэкс.
Мордовия Республикань Прявтонь пресс-службась