«Течи минь евтатано поздоровт ломантненень, кить ванстыть минек национальной сюпавчинть толонть, аволь закононь коряс керямонть, визькстэме ломантнень ды апак учо зыянов тевтнень эйстэ. Те веши ламо виень путома, важодемантень покш мелень явома, – мерсь республикань руководителесь. – Тевесь канды общественной покш смусть – бути мезесь-бути моли аволь истя пожароопасной шкастонть, весе важодить ансяк тень коряс, лия тевтнень стувтозь. Вирьтненень покш мелень явомась ды лезэвстэ сынст тевс нолдамось – те государстванть прявт тевезэ, масторонь экологической безопасностень юр».
Тешкстазель, прявт тевтнень ютксо – паломатнень каршо бороцямось. Вирень фондонь модатнень лангсо тедеде противопожарной башка режимень весе шканть перть апак редя вейкеяк покш палома. Тенень лездась видео мониторингесь. 19 камератне лездыть шкастонзо редямс вирьсэ лисиця зыянтнэнь. Иенть прядовомс улить путозь видеонаблюдениянь эште зярыя точкат.
Республикасонть «Экология» национальной проектэнть лувсо эряви редявикстэ киртямс озавтозь чувттнэнь емавксонть ды топавтомс вирьтнень вадрясто вельмевтеманть. Тедеде вирень вельмевтеманть арсеви ютавтомс малав 2 тежат гектартнэсэ. Мордовиянь Прявтось тешкстызе покш мероприятиятнень эрявиксчинть - «Сад Памяти», «Сохраним лес» (акциясь ютавтови маласо шкастонть, озавтовить 4 тежат чувтынеть).
«Мельспаро, од ломантне вейсэндявить те важодемантень - «Молодая гвардия», «Зеленый мир», казактнень обществась ды ламот лият. Неинь монсь, зярдо озавтынек чувтт, пек ламо од ломанть примить участия истят мероприятиятнесэ», – тешкстызе Артём Здунов.
Башка мель Мордовиясо явови озавтомань материалонь анокстамонтень – тедеде Зубова-Полянань ды Дубенкань енксонь вирень питомниктнесэ кастозь 5,5 млн чувтынеть. Текень пингстэ декоративной озавтовкстнэнь мельга республикань эрицятне поладыть ардтнеме лия регионтнэс. Мордовиянь Прявтось кармавтсь витемс неть тевтнень: тердемс инвесторт, максомс тенст мода. Те канды лезэ Саранскоенть ды лия оштнень пижелгавтомантень.
Те иень кавксо ковтнень перть вирень государственной инспектортнэ редясть вирень озавтовкстнэнь аволь закононь коряс 9 керямот. Вирень фондонтень кандозь емавксось – 19 млн целковойтнеде седе ламо. Артём Здунов тешкстызе, те енксонть коряс ванномась улезэ свалшкань, истя жо вирень фондонь модатнень ламолгавтомань коряс тевтнень топавтоманть мельга. Тевтнень ютксо, конатнень вети министерствась, - расчетной лесосекань тевс нолдамонь киртямось, отраслясо зарплатань кастомась.
Мордовиянь Прявтось явшесь наградат вирень хозяйствань важодицятненень. Истя, «Заслуженный лесовод Российской Федерации» почетонь лемесь максозь Кочкуровань участковой лесничествань вирьваныцянтень Василий Русяйкиннэнь.
«Те покш казне весе монь коллективенть туртов. Мон уш 40 иеть важодян вирень хозяйствань системасонть – ванстан вирень сюпавчитнень паломатнень, аволь закононь коряс керямотнень эйстэ. Мон вирень ваныцятнень династиясто – покштям ды лелям истя жо важодсть те енкссонть», – мерсь Василий Русяйкин.
«Тынк важодемась алтазь прявт тевентень – ванстомс ды ламолгавтомс вирень сюпавчинть, тынь ютавтадо просветительской покш важодема. Кадык шалныть вирьтне!» – евтась поздоровт вирень важодицянь профессиональной кенярксчинть кувалма Мордовиянь Госсобраниянь Председателень полавтыцясь Сергей Вдовин.
МР-нь Вирень, охотничьей хозяйствань ды природопользованиянь министрась Адель Галиуллин тешкстызе, прявт тевесь, конась ашти ведомстванть икеле, – вирень отраслянь цифровизациясь. Иенть прядовомс Мордовиясь масторонь васенце субъекттнэнь ютксо вейсэндяви вирень учетонь электронной системантень.
«Неень шкань изнявкстнэнь юронть путызь, нама, вирень отраслянь ветерантнэ. Сынь алтызь те тевентень эсь эрямост. Минек тевесь течи – ванстомс ды ламолгавтомс неть сюпавчитнень», – мерсь Адель Галиуллин.
Церемониянть шкасто истя жо евтазь «Сохраним лесное наследие Республики Мордовия» республикань пелькстамонь цетавкстнэ. «Лучший лесник Республики Мордовия» номинациясонть диплом максозь Виндрейской территориальной лесничествань вирьваныцянтень Василий Пятиннэнь, «Лучшая зона отдыха» номинациясонть - Темниковань территориальной лесничествань коллективентень, «Лучший лесопользователь Республики Мордовия» номинациясонть - «Агро-Дубенки» вирень анокстамонь организациянь коллективентень.
«Лучшее школьное лесничество Республики Мордовия» ванномасонть-пелькстамосонть изницякс кармасть Теньгушевань енксонь Барашевань средней школань тонавтницятне - «Зелёный патруль» школань лесничествась. Мордовиянь экологической сехте вадря организациякс кармась «Зеленый мир» движениясь.
Мордовия Республикань Прявтонь пресс-службась