Мордовиянь Прявтось Владимир Волков: "2017 иестэнть 3-7 иесэ весе эйкакштненень максовить таркат эйдень кужотнесэ"

2016 иень декабрянь 6-це чистэ Мордовиянь Прявтось Владимир Волков примась участия Саранск ошонь Мордовская куросонть 240 таркас эйдень од кужонть торжественной панжомасонть.

Инжетне васняяк ванкшнызь медицинань ды физиотерапевтэнь нупальтнень, бассейнанть, спортзалонть, изостудиянть, компьютерэнь классонть, психологонь нупаленть, ки ланга ардомань правилатнень тонавтнемань курыненть ды лиятнень.

Пищеблоконть ванномсто, Республикань Прявтось тешкстызе, 2018 иенть самс Мордовиясо карми теезь образовательной учреждениятнень туртов питаниянь комбинат.

"2013 иестэнть саезь, республикасонть минь панжтано 52-це эйдень кужо. 2017 иестэнть панжовить эштё колмо эйдень кужот, 3-7 иесэ весе эйкакштненень максовить таркат эйдень кужотнесэ, - мерсь Владимир Волков. - Мордовиянь прявтнэнь туртов пек эряви, эйкакштненень максовозо пек вадря образования неень шкань вешематнень коряс теезь помещениятнесэ. Тонавтомань системась улезэ ладязь истя, эйкакштнень содамочист меревельть получамс образования масторонь сехте вадря вузтнэсэ, од ломантне улест конкурентноспособноекс ды пек превеекс".

Мордовиянь Прявтось тешкстызе, регионсонть теевить вадря зарплата марто од производстват, косо мереви важодемс тонавтнемань заведениятнень прядыцятненень. Стявтовить спортонь од объектт ды культурань учрежденият. Тееви весемесь, ломантнень эрямост вадрялгавтомга.

"Республикань руководствась кемекстась решения поладомс ипотекань 5% льготань ипотеканть 2017 иень декабрянь 31-це чинть самс, лездамс ломантненень вадрялгавтомс эрямонь условиясь", - мерсь В.Д.Волков.

Тешкстасынек, эйдень те кужосонть пурнавить 12 группат, вейкесь эйстэст - лавшо шумбрачи марто эйдетнень. Истя жо тосо важодить педагог-психолог ды логопед.

Эйкакшонь ёрокчинь кастомань 2№ центранть питнезэ 178,5 млн целковойть, 31,4 млн целковойтне явозь республикань бюджетстэ, 147,1 млн целковойтне - муниципальнойстэ. Весемезэ Саранскойсэ важодить муниципальной дошкольной 70 учрежденият.

МР-нь Прявтось казсь эйдень кужонтень налксемань мультимедиянь лаборатория.

Мероприятиясонть примась участия Саранск ошонь округонь прявтось Петр Тултаев.