Ноябрянь 25-це чистэ Саранскойсэ ютавтовсь покш мероприятия, панжовсь «Реконструкция и строительство автомобильной дороги до аэропорта г. Саранска» объектэсь. Од кинть панжизь Мордовиянь Прявтось Владимир Волков ды Кинь федеральной агентствань прявтось Роман Старовойт.
Мордовиянь Прявтось тешкстызе, од килангось теезь Россиянь Президентэнть В.В.Путинэнь лезксэнзэ вельде. Покш путовксозо Кинь федеральной агентствантькак. Те кись ды транспортонь лия од развязкатне, конатне теезь Саранскойсэ, лездыть 2018 иень Футболонь коряс масторлангонь чемпионатонь болельщиктненень ды инжетненень куроксто ды мелявкстомо пачкодемс аэропортсто стадиононть видьс.
" Од кинть теемстэ тевс нолдавсть ансяк од технологиятне ды неень шкань материалтнэ, - тешкстызе эсь кортамосонзо Владимир Волков. - Башка мель явовсь зыянтомочинтень. Ней минек икеле ашти эштё вейке покш тев - шкастонзо прядомс пассажирэнь терминалонть ды ливтямонь полосанть теемаст ды Чемпионатонтень панжомс целанек весе те комплексэнть".
Владимир Волков тешкстызе, неень шкане килангонь инфраструктуранть строямось икельди лия объекттнэнь анокчинть, конатне теевить Саранскойсэ 2018 иень первенствантень анокстамонть лувсо.
Од кинть панжоманзо коряс республикань эрицятненень поздоровт ёвтась килангонь федеральной агентствань прявтось Роман Старовойт.
"Течинь мероприятиясь - килангонь теемань покш пелькс, конат топавтовить регионсонть Владимир Дмитриевич Волковонь прявтсо. Арсян, Мордовиянть сатыть виензэ топавтомс строямонть коряс весе арсезенть, теньсэ республикась минек уш аволь весть кемевтимизь. Теке марто ёвтаса, килангонь федеральной агентствась малав кавто иеде икеле тешкстазенть коряс вадрялгавтынзе весе федеральной китнень, конат ютыть республикаванть", - мерсь Роман Старовойт.
Торжественной мероприятиянть лувсо башка тешкставсть сеть, кить чинек-венек топавтсть эсь роботаст ды тейсть кинть. Мордовиянь Прявтонть ды Росавтодоронь руководителенть пельде казнеть максовсть строицятненень.
Мордовияв важодемань тевтнень коряс самонть лувсо Роман Старовойт истя жо ваннызе аэропортонь комплексэнть витнеманзо, строявиця стадиононть малава вадрялгавтозь китнень ды истя жо ванкшнызе Саранск ошонь Восточной обходонь теевиця килангонть.
Справкась:
Аэропортонтень молиця кинть кувалмозо - 3,5 километрат. Сынст эйстэ 1,1 километратне - одкстомтозь, меельцетне - теезь одс. Кинть кувалт теезь ялго ютамонь ды велосипедсэ ардомань яннэть. Строямонь-монтажонь тевтне объектсэнть ушодозь 2015 иень авгуссто. Объектэнть питнезэ - 213 млн целковойть.
Восточной обходонь кинть кувалмозо 16 вайгельпеть, сон вейсэндясынзе Саранск - Ульяновск ды Саранск - Рузаевка китнень Николаевка ды Ялга посёлкатнень маласо. Кинть теемазо ушодовсь 2013 иестэ, прядомс арсеви 2017 иень декабрясто.
Неень шкане кадовсь теемс 6,5 вайгельпеть. Те участкасонть арсевить вете сэдть, конатнень ютксо - сэдесь-эстакадаст Инсар леенть ды чугункань кинть трокс (400 метрат) ды 100 метрань кувалмосо сэдесь Саранск - Рузаевка кинть велькска.