Февралень 9-це чистэ Мордовиянь Прявтось Владимир Волков ютавтсь вастовома Саранскоень ды Мордовиянь митрополитэнть Зиновиень ды Рузонь православной церьковань тонавтнемань комитетэнь председателень васенце полавтыцянть Максим Козловонь марто.
Вастовомасонть кортамось мольсь республикасонть духовной образованиянть виевгавтомадонзо. Кортавсть Саранскоень духовной училищанть, конась важоди 1997 иестэ саезь, духовной семинарияс тееманть марто сюлмавозь кевкстематне.
Владимир Волков тешкстызе, республикась кирди митрополиянть бажамонзо ды арси кармамс Россиянь духовной образованиянь куншкакуротнестэ вейкекс, тосо кармить анокставомо тевест вадрясто содыця священникть аволь ансяк эсенек, истя жо лия регионтнэнь туртов.
Вастовомасонть ульнесть Мордовия Республикань Прявтонть администрациянь руководителесь Николай Крутов, Саранск ошонь округонь прявтось Петр Тултаев, попечительской советэнь председателесь Виктор Бирюков, истя жо РПЦ-нь тонавтнемань комитетэнь представительтне.
Мордовия Республикань Прявтонть пресс-службась