Январень 16-це чистэ Республикань Кудонь Колонной залсонть ютавтовсь торжественной промкс, конась алтазель Россиянь Печатень чинтень. Республикань журналистнэнень поздоровт ёвтась Мордовиянь Прявтось Владимир Волков. Региононь Прявтось тешкстынзе массовой информациянь средстватнень таликаст обществань эрямосонть, ёвтызе, журналисттнэнь важодемаст лезды властентень шкастонзо редямс ды витемс пшти кевкстематнень, республиканть седе тов виевгавтомантень.
Ладязь коенть коряс Мордовиянь Прявтось ёвтынзе 2017 иень итогтнень. Ламот невтевкстнэнь коряс Мордовиясь прядызе иенть седе вадрясто, икеленьсенть коряс. Вадря невтевкст редязь экономикань весе отраслятнесэ, сынст юткссо промышленностесь, велень хозяйствась, строительствась. Прпомышленной производствань индексэсь кармась 111% – те масторонь келес вадря невтевкстнэде вейкесь. Мелят панжозь 12 од производстват, ушодозь строямо эштё 6 заводт. Покшолгадсть инвестициятне прявт капиталонтень. Прявт изнявксокс кармась Рузаевкасо икельдиця социально-экономической виевгавтомань территориянь теемась.
Пек вадря невтевксэст Мордовиянь аграрийтнень: пурназь рекордонь урожай – 1 миллион 450 тёжадо ламо тоннат сюро. Вадрясто важодсть строительтне. Мелят строязь эрямо таркань 330 тёжат кавонзазь метрат. Максозь 5 тёжат ипотекань кредитт, вейсэнь питнесэ 7,5 млрд целковойть. Те 1,5-ксть седе ламо икеле иенть коряс. Колмоце пельксэнть эйстэст саить льготань ипотекань кредитттнэ – 5% иезэнзэ.
«Минек туртов те пек эрявикс экономикантень лезксэнь явомань коряскак. Льготань ипотекань программань важодемань кавто иетнень перть республикань строямонь отраслянтень путозь инвестицият малав 7 миллиард целковойть», – тешкстызе Мордовиянь Прявтось.
Строямонь отраслясонть важодемань покш пелькс савсь футболонь коряс масторлангонь чемпионатонтень анокстамонть лангс. Ламо теезь Саранскоенть ды Рузаевканть вадрялгавтомга-мазылгавтомга. Чугункань кинь важодицятнень ошось карми вадрялгавтовомо седе товгак.
2017 иестэнть властнень прявт тевекс, кода тешкстызе Республикань Прявтось, ульнесь инфляциянь икельдиця зарплатанть кепедемась. Ды тень удалась теемс. Иень невтевкстнень коряс Мордовиясо средней зарплатась кармась малав 25 тёжат целковойть.
Бути кортамс республикань бюджетэнть «ёжодонзо» ды государственной долгтонть – тесэ тевтне, кода кемевтинзе журналисттнэнь Владимир Волков, ванновт ало. Республикась топавтсь прявт проектт промышленностесэ ды велень хозяйствасо, Эрзянь-мокшонь раськенть Россиянь государствань лия раськетнень марто вейсэндявомань 1000 иетнень топодемань тешкстамонтонь ды футболонь коряс масторлангонь чемпионатонь строямонь покш программатне. Капитальной путовкстнэнь покшолмаст неть мероприятиятнень марто редявикстэ кассь. Теде башка, Мордовиясь прими участия федеральной весе программатнесэ ды топавты сынст софинансированиянть, мезесь истя жо путы стакачи бюджетэнть лангс. Республиканть прявт позициязо, кода тешкстызе Владимир Волков, – седе товгак примамс участия федеральной программатнесэ, муемс возможность сынст софинансированиянть туртов, региононь виевгавтомась поладовозо. Текень пингстэ государственной долгонь киртямонь коряс важодемась поладови, сонзэ покш пельксэсь ладязь од лувсо, бюджетэнь кредитнэнь коряс процентэнь ставкась 0,1% иезэнзэ.
Весе неть тематне невтевить республикань СМИ-сэ. Мордовиянь Прявтонть казнензэ лангс журналистэнь пелькстамонь изницятненень явшесть казнеть. Тень пингстэ региононь руководителесь тешкстынзе «Человек труда» ды «Во имя процветания» номинациятнесэ «Известия Мордовии» газетань вадря материалтнэнь, «Столица С» газетанть Ирина Затылкова журналистэнть важодеманзо.
Иень панжомакс кармась «Народное телевидение Мордовии» телекомпаниясь. Важодемань аволь пешксе иень перть коллективесь покшолгавтызе эсензэ вещаниянь шканть 8 часос чизэнзэ.
Од форматнэнь ютксо, конат виевстэ невтизь пряст пелькстамотнесэ, тешкстазь «Старт-ФМ» радиось.
Эштё вейке виев эскелькс спортонь журналистикасонть истя жо теезь радиопередачань лувсо. «Мордовиянь Радиос» велявтсь журналистикань ветеранось Геннадий Ухтинский, конась эрьва середа лиси эфирс «История мордовского спорта» программанть марто.
«ИнтоНация» номинациясонть, конась алтазь раськетнень ютксо ялгаксчинь сюлмотнень кемекстамонтень, башка тешкстазь зярыя редакцият: «Вайгель» радиось, «Мокшень Правда» газетась, «Восход» Покш Игнатовань газетась.
Мордовиянь Прявтось истя жо ёвтызе вадря невтевксэкс «Рузаевской газетань» редакциянть. Сон васенцекс республикасонть кармась ламо форматонь. Тесэ журналисттнэ ве шкасто анокстыть материалт газетас, Интернет-порталс ды Мордовиянь келес райононь вейкине телевиденияс.
«Вестник Мордовии» кулянь агенстванть Республикань Прявтось тешкстызе кода интернетсэ федеральной источниктнес сехте сеедьстэ саевция лисьмапря Мордовиянь СМИ-нь ютксто. Владимир Волков шнызе сонзэ редакторонть Виталий Моисеевень важодемань ёрокчинть.
Прессанть важодемасо прявт ёнксокс, кода тешкстызе Республикань Прявтось вастовоманть прядовомсто, кадовозо видечинть невтемась. Материалтнэнь анокстамсто вадря важодеманть эйстэ ашти ломантнень пельде СМИ-тненень кемемась.
«Лиякс тулкадеви аудиториясь, ловныцятне ды пачкодтяно сенес, киосктнесэ а рамави эсенек прессась. Неть тевтне уш вастневить ламот регионтнэсэ, минек шабратненьгак. Вадря, бути тосо микшневить федеральной изданиятнень региононь приложениятне. Мордовиянь медиарынкань виевчись – минк вейсэнь изнявкс, конань эряви ванстомс», – мерсь Владимир Волков.
Мордовия Республикань Прявтонть пресс-службась