Мартонь 18-це чистэ, субутасто, Мордовиянь Прявтось Владимир Волков примась участия Равчирень федеральной округонь студенттнэнь ютксо «IQ ПФО» Интеллектуальной олимпиаданть пекстамосо. Торжественной промкссось ютавтовсь Республикань культурань дворецсэнть.
«Омбоце ие Саранскойсэ ютатвови «IQ ПФО» Интеллектуальной олимпиадась. Минь теинек весементь, штобу тынк тесэ улемась улезэ лезэвекс ды мельстуицякс, - мерсь Владимир Волков. - Прявтось, штобу наукантень тынк васенце эскельксэнк кармавольть кочказь покш кинь ушодксокс».
Республикасонть ламо тееви од ломанень движениянтень лездамонть туртов. Важодить од ломанень 40 ламо эрьва кодат вейсэндявкст. 20 иень перть топавты тевензэ интеллектуальной шкинемань клубось, МР-нь Госсобраниянть пингстэ Од ломанень общественной палатась, студентэнь отрядтнэ, топавтови «Од депутатонь школа» федеральной проектэсь. Покш мель явови волонтёронь движениянтень, конань активисттнэ примить участия масторонь ды мирэнь мероприятиятнесэ.
«Мон арсян, истят форумтнесэ арасть изницят ды изнязть. Тосо участиясь лезды теевемс содавиксэкс вейкест-вейкест марто, муемс од ялгат, максомс од содамочить-маштомачить лия региононь коллегатнень марто, - мерсь Мордовиянь Прявтось. - Минек организатортнэ бажасть невтемс интеллектуальной вейсэндявксонть аволь ансяк научной эрямонть, истя жо культурань».
ПФО-со РФ-нь Президентэнть полномочной предстваителенть Михаил Бабичень пельде шумбракстнемань валт ёвтась сонзэ полавтыцязо Игорь Паньшин, сон ёвтась сюкпрянь валт республикань кирдийтненень ды МР-нь Прявтонтень В.Д.Волковнень башка.
«Минь ёвтатано Тенк сюкпрянь валт вадрясто теезь тонавтнемань таркатнень, пек вадрясто анокстазь бытовой условиятнень, культурань сюпав программанть кисэ. Мордовиясь свал ульнесь ды кадови ПФО-со икелев молиця республикатнестэ вейкекс», - мерсь Игорь Паньшин.
Интеллектуальной турнирсэнть пелькстасть 14 регионсто 210 од ломанть. Олимпиадань округонь этапонь программась аштесь зярыя пелькстэ: «Управленческие поединки», «Парламентские дебаты», «Что? Где? Когда?» налксемась, «Спортивное программирование» ды «Робототехника».
«IQ ПФО» - те общественной од проект, конась кочказь «iВолга - 2015» округонь форумсонть ПФО-нь Од ломанень советэнь конкурсонь 14 важодематнень эйстэ. Самай сестэ кемекстазель решения топавтомс те проектэнть Мордовиясо.
Изницятне:
Прявт казненть командатнень ютксто саизе Пермень краень командась, омбоце таркасо - Мордовия Республикась, колмоцесэнть - Татарстан Республикась.
«Парламентские дебаты» номинациясонть I тарканть саизе Пермень краень командась, II тарканть - Саратовань областесь, III таркасонть - Татарстан Республикась.
«Управленческие поединки» командасонть I тарканть саизе Вадим Руин (Мордовия), II тарканть - Ангелина Земцова (Мордовия), III тарканть - Анна Косурина (Башкортостан).
«Что? Где? Когда?» интеллектуальной налксемасонть I тарканть саизе Самарань областень командась, II тарканть - Нижегородской областесь, III тарканть - Пермень краесь.
«Программирование» номинациясонть I тарканть саизе Саратовань областесь, II тарканть - Пермень краесь, III тарканть - Татарстан Республикась.
«Робототехника» номинациясонть казнень таркатне явшевсть истя: I таркась - Мордовия Республикась, II таркась - Пензань областесь, III таркась - Татарстан Республикась.